Guðni opnaði World Class á Selfossi: „Bændur eru allt of feitir“

„Bændur eru allt of feitir, þeir eru komnir með róbóta í fjósin sín og þurfa lítið að gera. Þeir þurfa líka að huga að mataræðinu eins og aðrir, sleppa gosinu, snakkinu og sælgætinu,“ sagði Guðni Ágústsson, fyrrverandi landbúnaðarráðherra, og uppskar mikinn hlátur þegar hann opnaði formlega nýja líkamsræktarstöð World Class á Selfossi í dag að viðstöddu fjölmenni.

Þetta er tíunda stöð World Class og sú allra fullkomnasta, með splunkunýjum tækjum fyrir um 120 milljónir króna. Stöðin er staðsett í 850 fermetra rými í nýju húsnæði við Sundhöll Selfoss.

Langar biðraðir hafa verið við stöðina í dag þar sem fólk keppist við að kaupa árskort en það er selt á 60.000 krónur í tilefni af opnuninni. Innifalið í því er frítt í sund í Sundhöll Selfoss.