Mané hetja Liverpool | Sjáðu markið

Sadio Mané var hetja Liverpool í Merseyside-slagnum í kvöld þegar hann tryggði gestunum sigur í leik erkifjendanna, 1-0, með marki í uppbótartíma.

Fyrri hálfleikurinn var ekki mikið fyrir augað en belgíski framhherjinn Divock Origi fékk tækifæri til að koma Liverpool yfir á 37. mínútu en skaut þá boltanum framhjá eftir góða sendingu frá Nathaniel Clyne.

Liverpool komst aftur í gott færi, reyndar dauðafæri, í byrjun seinni hálfleik en Maarten Stekelenburg varði frábærlega einn á móti Brassanum. Mikill darraðadans var í teig Everton eftir vörsluna en heimamenn komu boltanum frá.

Stekelenburg þurfti síðar að fara af velli vegna meiðsla en Joel Robles kom kaldur inn inn af bekknum á 64. mínútu. Svekkjandi fyrir Everton en sá hollenski var búinn að spila vel.

Robles gerði þó vel í að verja skot frá Roberto Firmino eftir hornspyrnu þegar tíu mínútur voru eftir af venjulegum leiktíma. Spænski markvörðurinn henti sér snöggt niður og varði viðstöðulaust skot Firmino sem hitti boltann vel.

Eftir tæpar sjötíu mínútur tæklaði Ross Barkley, miðjumaður Everton, Jordan Henderson, fyrirliða Liverpool, svakalega en slapp með gult spjald þegar flestir á bandi Rauða hersins vildu sjá rautt. Barkley líklega heppinn að fjúka ekki út af.

Uppbótartími var átta mínútur og eftir tæpar fjórar mínútur af honum skoraði Sadio Mané sigurmark Liverpool og allt ætlaði um koll að keyra hjá stuðningsmönnum liðsins á Goodison Park.

Varamarkvörðurinn Robles verður að taka hluta sakarinnar á sig en hann náði ekki til boltans þegar Daniel Sturridge átti laflaust skot fyrir utan teiginn. Boltinn hafnaði í stönginni og áður en Robles náði til hans var Mané mættur. Senegalinn er nú búinn að skora átta mörk og leggja upp fimm fyrir Liverpool í úrvaldeildinni á leiktíðinni.

Flottur sigur hjá Liverpool og dramatískur en með sigrinum komst liðið upp í annað sætið þar sem það er með 37 stig, sex stigum á eftir toppliði Chelsea. Everton er áfram í níunda sæti með 23 stig.

Farið verður yfir leikinn og alla hina í umferðinni í Messunni sem hefst á Stöð 2 Sport HD klukkan 22.00.