Virki og göng frá Sturlungaöld gætu verið fundin á Hrafnseyri

Virkisveggur og undirgöng frá tólftu öld, sem sagt er frá í Íslendingasögum, kunna að vera fundin á Hrafnseyri við Arnarfjörð með fjarkönnun. 

Hrafnseyri er ekki aðeins þekkt fyrir að vera fæðingarstaður Jóns Sigurðssonar forseta. Þar bjó á tólftu öld höfðinginn Hrafn Sveinbjarnarson, sem Þorvaldur Vatnsfirðingur drap við upphaf Sturlungaaldar, en Hrafn er talinn fyrsti lærði læknir landsins. 

Margrét Hrönn Hallmundsdóttir fornleifafræðingur flutti í dag fyrirlestur í Þjóðminjasafninu um rannsóknir sínar á Hrafnseyri undanfarin sex ár. Þær gætu verið að leiða í ljós mannvirki sem greint er frá í Hrafns sögu Sveinbjarnarsonar, en hún er talin samtímaheimild. 

„Og þar er sagt að Hrafn hafi byggt í kringum bæ sinn virki mikið. Það var það hátt að þeir þurftu að standa ofan á skildi til þess að komast yfir virkisvegginn,“ segir Margrét Hrönn í viðtali í fréttum Stöðvar 2.

„Svo er líka greint frá því að það hafi verið göng, - og þá ekki ósvipuð þeim sem fundust á Keldum, - sem sagt: Þetta var ekki óþekkt á Sturlungaöld. Við höfum fundið sem sagt merki um það," segir hún. 

Staðarhaldarinn á Hrafnseyri, Valdimar J. Halldórsson, sýndi okkur hvar merki hafa fundist um þennan mikla vegg en hann virðist síðan liggja í gegnum núverandi kirkjugarð og áfram meðfram bekkunni fyrir ofan.

Margrét segir að veggurinn sé tveir metrar á breidd og gerður úr mjög stóru grjóti. Hún tekur fram að einnig séu til heimildir um veglega túngarða á Hrafnseyri.

„En tveir metrar í grunninn á svona vegg er mjög, mjög breitt, og mikið breiðara en venjulegir túngarðar eru,“ segir Margrét, - án þess þó að vilja staðhæfa að virkisveggurinn sé fundinn. 

Undirgöngin eru ekki síður spennandi en þau eru talin hafa legið við suðvesturhorn núverandi kirkjugarðs. Sagan segir að synir Hrafns hafi gert göngin. 

„Þegar við gerðum fjarkönnun árið 2014 þá kemur í ljós að það er vissulega eitthvað holrúm þarna undir. En sumir segja að það sé bara vatnsrás í túninu. En svo gerði ég könnunarskurð, reyndar bara lítinn, og þá kom í ljós að að það er einhver strúktur þarna undir.

Það verður rannsakað frekar í sumar og þá kannski sér maður hvort þetta eru göng frá Sturlungaöld eða hvort þetta er bara einhver önnur bygging,“ segir Margrét Hrönn Hallmunsdóttir fornleifafræðingur.