Réðust á par með hnífum og hamri

Hæstiréttur staðfesti í gær gæsluvarðhaldsúrskurð Héraðsdóms Reykjavíkur yfir manni sem gert er að hafa ásamt öðrum manni ráðist á par með hnífi og hamri á laugardagskvöldið. Mennirnir frelsissviptu þau og stolið af þeim fartölvu og síma.

Mennirnir eru sagðir hafa rutt sér leið inn íbúð í Breiðholti og veist að stúlku og kærasta hennar, hugsanlega vegna fíkniefnaskuldar. Þeir hafa báðir verið dæmdir fyrir ofbeldisbrot áður.

Þegar lögreglan kom á vettvang voru mennirnir farnir en stúlkan sagði þá hafa ruðst inn í herbergi þar sem kærasti hennar lá sofandi og ráðist á hann. Hún segir annan þeirra hafa tekið upp hníf og skorið kærastann í fótinn. Því næst hafi þeir látið höggin dynja á honum.

Tilefnið fíkniefnaskuld

Þá tóku þeir hana og hentu henni í horn herbergisins, skáru hana í andlitið og kýldu einnig. Þá heimtuðu þeir að fá peninga eða einhver verðmæti. Hún sagðist telja að tilefni árásarinnar væru fíkniefnaskuldir kærasta síns, en var samt ekki viss.

Þau voru með skurð í andliti eftir hníf og kærastinn var einnig með skurð á fæti og sagðist hann einnig hafa verið laminn með hamri.

Mennirnir tveir voru handteknir í íbúð annars þeirra daginn eftir og við leit þar fundust fartölva og gsm sími sem hafði verið tekinn af parinu. Þar að auki fundust blóðugar buxur í óhreinu taui og einnig blóðugur bolur. Lögregluþjónar fundu einnig hníf með blóðkámi í vasa eins þeirra, dúkahníf með blóðkámi í stofu íbúðarinnar og klaufhamar í gluggakistu svefnherbergis.

Vinurinn væri „svo klikkaður“

Mennirnir tveir náðust á upptökur úr eftirlitsmyndavélakerfi fjölbýlishússins. Eftir að þeir voru handteknir sagði annar þeirra að hinn hefði átt allan þátt í árásinni og sjálfur hefði hann einungis verið þarna til að verja stúlkuna, þar sem vinur sinn væri „svo klikkaður“.

Lögreglan vildi fá mennina úrskurðaða í gæsluvarðhald og í einangrun svo þeir gætu ekki torveldað rannsókn málsins. Héraðsdómur Reykjavíkur úrskurðaði báða mennina í gæsluvarðhald til mánudagsins 24. ágúst, en annar maðurinn kærði úrskurðinn til Hæstaréttar. Hæstiréttur staðfesti þá ákvörðun í gær.

Dóm Hæstaréttar má sjá hér.