Húsnæðisfrumvarp félagsmálaráðherra leiði af sér hærra leiguverð

Auðun Freyr Ingvarsson, framkvæmdastjóri Félagsbústaða, segir að verði húsnæðismálafrumvarp félagsmálaráðherra að lögum muni það leiða af sér hærra leiguverð á félagslegum íbúðum á höfuðborgarsvæðinu og að vanskil muni aukast verulega. Það muni koma niður á lánskjörum félagsins, en húsaleigubætur eru nær helmingur af heildartekjum þess.

Eygló Harðardóttir, félags- og húsnæðismálaráðherra, lagði frumvarpið fram á liðnu þingi. Nokkrar deilur urðu um það og að hennar sögn hvatti Bjarni Benediktsson fjármálaráðherra hana til að draga það til baka eftir kostnaðarmat í fjármálaráðuneytinu. Auðun skilaði af sér umsögn um frumvarpið í gær.

„Fari þetta frumvarp í gegn óbreytt þá er félagsbústöðum ekki lengur heimilt að fá greiddar húsaleigubætur beint til sín frá yfirvöldum og við erum hrædd við það að það gæti leitt af sér meiri vanskil en það hefur áhrif á tekjustreymi félagsins, þar sem við höfum ekki öðrum tekjum að dreifa heldur en leigutekjum. Ef vanskil aukast þá bitnar það helst á þeim sem eru í skilum við félagið í formi hærri leigu,” segir hann.

Í umsögninni kemur fram að þar sem félagið geti ekki gengið að húsnæðisbótum vísum, muni lánskjör félagsins versna á almennum markaði, sem leiði af sér hækkun kostnaðar og leigu.

„Húsaleigubætur eru um 45 prósent af tekjum félagsbústaða, bæði sérstakar og almennar húsnæðisbætur. Öll óvissa um tekjustreymi hefur áhrif á lánshæfi og mat fjármálafyrirtækja á getu til þess að greiða af okkar skuldbindingum,” segir Auðun.

Í samantekt um frumvarpið segir að markmið þess sé að lækka húsnæðiskostnað efnaminni leigjenda þannig að stuðningurinn verði jafnari húsnæðisstuðningi við kaupendur íbúðarhúsnæðis innan vaxtabótakerfisins, og liður í að jafna húsnæðisstuðning hins opinbera við ólík búsetuform.

Auðun segir að hans mat sé að ný lög um húsnæðibætur ættu að veita einstaklingum sem leigja herbergi á almennum markaði rétt til húsaleigubóta, en það myndi auka framboð af leiguúrræðum.