Segir ljósastaura við Reykjanesbraut lífshættulega

Ólafur Guðmundsson, tæknistjóri EuroRAP á Íslandi, segir ljósastaura við Reykjanesbrautina vera ólöglega og lífshættulega. „Ég veit um tvö banaslys þar sem keyrt hefur verið á þessa staura,“ segir Ólafur en EuroRAP sér um að kanna öryggi vega um alla Evrópu.

Þá bæti hann við að fjöldi alvarlega slysa hafi orðið þar sem ekið sé á ljósstaurana.

Ólafur segir að stór hluti stauranna við Reykjanesbrautina hafi aldrei verið öryggisprófaðir og afgangurinn uppfylli ekki evrópska öryggisstaðla. „Staurarnir sem settir upprunalega amerískir staurar sem uppfylltu ekki evrópska öryggisstaðla. Síðan þá hafi verið settir upp íslenskir staurar sem ekki hafi verið öryggisprófaðir,“ segir hann.

Staurarnir bara til þess að keyra á þá

Ljósastaurarnir  í vegkantinum hægra megin við veginn en þar er ekkert vegrið. Það er stórhættulegt og nauðsynlegt er að setja upp vegrið til að verja staurana að sögn Ólafs. „Ef menn vilja lýsa upp Reykjanesbrautina ætti hún að vera í miðjunni með vegriðið sitt hvoru megin eins og gert er í Ártúnsbrekkunni,“ segir hann.

Frá bankahruni hefur aðeins verið kveikt á öðrum hverjum ljósstaur við Reykjanesbrautina. Ólafur segir það stórhættulegt. „Þeir eru ekki neinum gagns og eru bara til þess að keyra á þá,“ segir hann.

Ólafur segir að EuroRAP hafi komist að því að staurarnir uppfylltu ekki öryggisstaðla á árunum 2006 til 2007. Síðan þá hafi ekkert verið gert þrátt fyrir ítrekaðar ábendingar. Hann  segir það hafi verið pólitíska ákvörðun að setja staurana upp á sínum tíma. Það sé samdóma álit sérfræðinga að ljósastaurarnir á Reykjanesbrautinni séu óþarfir því bílar lýsi sjálfir upp þjóðveginn. „Götulýsing er fyrir ólýsta umferð en bílar í dag eru með ljósum,“ segir  Ólafur.  

 

Lýsingin gagnslítil

Þá telur Ólafur sérstaklega lítið gagn af staurunum við Reykjanesbrautina því þeir hafi verið settir upp áður en vegurinn var tvöfaldaður. „Staurarnir lýsa aðeins aðra akreinina og þegar aðeins er kveikt á öðrum hverjum staur má segja að það sé að lýsingin sé aðeins einn fjórði af fullri lýsingu,“ segir hann.

„Eftir standa þá ólýstir dimmir staurar sem sjást illa og til einskis annars en að keyra á þá,“ segir Ólafur.

Ljósastaurarnir eru víðar en bara við Reykjanesbrautina. „Þeir eru Vesturlandsveginn frá Reykjavík og upp í Mosfellsbæ, óvarðir og kolólöglegir,“ segir Ólafur.  Staurana er einnig að finna milli Reykjavíkur og Selfoss og á Akureyri.

Ólafur bætir þó við að Vegagerðin hafi tekið tillit til þeirrar gagnrýni sem EuroRAP hafi sett fram og síðustu þrjú ár hafi verið settir upp ljósastaurar sem uppfylli öryggisstaðla.