Bætt raforkuöryggi á Vestfjörðum er forgangsmál

Bætt raforkuöryggi á Vestfjörðum er forgangsmál og sérstakur starfshópur iðnaðar- og viðskiptaráðherra hefur það hlutverk að meta leiðir til að bæta þar um hefur skilað árlegri skýrslu sinni um raforkuöryggi á Vestfjörðum.

Í skýrslunni er ítarleg umfjöllun um styrkingu flutnings- og dreifikerfisins á Vestfjörðum ásamt möguleikum á uppbyggingu virkjanakosta í héraði. Fram kemur í skýrslunni að almennt hafi bilunum á línum á Vestfjörðum farið fækkandi síðan 2009.

Á síðustu misserum hefur verið ráðist í ýmsar framkvæmdir til uppbyggingar flutnings- og dreifikerfis raforku á Vestfjörðum.

Endurbætur voru gerðar á Mjólkár-, Tálknafjarðar-, Bolungarvíkur- og Breiðadalslínum á árinu.

Í skýrslunni kemur fram að minna afhendingaröryggi raforku á Vestfjörðum megi rekja til ótryggrar geislatengingar við flutningskerfið ásamt hærri bilanatíðni og lengri viðgerðartíma loftlína á svæðinu. Síðustu tveir vetur voru óvenju harðir og voru sjö tilvik ofsaveðurs á Vestfjörðum, með tilheyrandi röskun í raforkukerfinu.

Í umfjöllun um framtíðarmöguleika á svæðinu er m.a. fjallað um þá möguleika sem opnast með nýjum Dýrafjarðargöngum en með þeim skapast skilyrði fyrir endurbótum á flutningskerfinu frá Mjólká að Breiðadal í Önundarfirði. Nauðsynlegt er að vinna áfram að nýrri 66 kV hringtengingu fyrir sunnanverða Vestfirði.

Endurnýja þarf aðveitustöðina í Breiðadal. Orkukostir sem eru til skoðunar á Vestfjörðum, eru stækkun Mjólkárvirkjunar, 2 MW vindorkuver og varmadælur fyrir kyndistöðvar. Glámuvirkjun í núverandi mynd verður ekki tekin fyrir í rammaáætlun vegna áhrifa á friðun í Vatnsfirði.

Því er tillaga starfshópsins að fara í skoðun á minni og öðruvísi virkjanakostum á Glámuhálendinu. Hvalárvirkjun er komin í nýtingarflokk rammaáætlunar og framkvæmdaaðilar eru búnir að semja um vatnsréttindi.