„Vonandi fá þær einhvern tímann svör við þessum spurningum“

Leikmenn 5. flokks kvenna í knattspyrnu hjá FH spyrja spurninga í nýju myndbandi sem nú ferðast á milli fólks á Facebook. Boðskapurinn er einfaldur. Af hverju njóta stelpur ekki sömu réttinda og strákar þegar kemur að íþróttum?

Ebba Særún Brynjarsdóttir er meðal þeirra sem deilir myndbandinu á Fésbókinni en hún á tvær dætur í flokknum. Hún segir dætur sínar og stelpurnar í liðinu hafa átt hugmyndina sjálfar og fengu þær litla bróður í lið með sér.

Segist Ebba Særún vonast til þess að dætur sínar og liðsfélagar þeirra fái einhvern tímann svör við þessum spurningum. Greinilegt er að stelpurnar ætla sér stóra hluti í fótboltanum en liðið vann meðal annars til verðlauna á Símamótinu fyrr í sumar.

Reikna má með að sumar séu farnar að hugsa um atvinnumannadrauminn ef marka má spurningar þeirra. Meðal spurninga sem þær spyrja eru:

• Af hverju mætir fleira fólk á strákaleiki en stelpuleiki?
• Af hverju fá strákar mikið stærri bikara heldur en stelpur?
• Af fá strákar betri samninga heldur en stelpur?
• Af hverju eru alltaf strákaleikir sýndir í sjónvarpinu en ekki stelpuleikir?
• Af hverju eru alltaf strákar krýndir íþróttamaður ársins en ekki stelpur?
• Af hverju fá strákar betri laun en stelpur í fótbolta?

 

„Við erum ekkert verri en þeir í boltanum,“ segir einn leikmaðurinn áður en skýr skilaboð eru send: „Áfram stelpur!“

Dætur mínar tvær og liðið sem þær spila með í 5fl kvk FH ákváðu að búa til myndband.Hugmyndin var algerlega þeirra og þæ...

Posted by Ebba Særún Brynjarsdóttir on Friday, August 21, 2015