Kostnaður vegna verkfallsaðgerða meiri en 400 milljónir

Laun lækna hækka um meira en tíu prósent strax við samþykkt nýs kjarasamningar sem undirritaður var á milli lækna og ríkisins í nótt. Þá fá þeir 160 þúsund króna eingreiðslu. Kostnaður Landspítalans vegna verkfallsaðgerðanna er meira en fjögur hundruð milljónir króna.

Kjarasamningurinn er til þriggja ára en hann er afturvirkur frá síðasta sumri og gildir fram í apríl 2017. Efnisatriði samningsins verða ekki birt fyrr en búið er að kynna læknum kjarasamninginn. Hann er nokkuð flókinn og felur í sér uppstokkun á launatöflu og vinnufyrirkomulagi. Samkvæmt heimildum fréttastofu fá læknar strax við undirritun samningsins ríflega 10 prósent launahækkun. Þar sem læknar voru samningslausir frá því síðasta sumar bætist einnig við 160 þúsund króna eingreiðsla ef samningurinn verður samþykktur. Þá munu laun lækna hækka enn frekar á samningstímanum en það verður í nokkrum þrepum. Auk þess eru launapottar sem stjórnendur stofnanna koma til með að ráðstafa til síns fólks.

Bjarni Benediktsson fjármála- og efnahagsráðherra fagnar því að samningar hafi tekist við lækna.

„Það sem að við höfðum boðið læknum áður en að samningar tókust voru launahækkanir og kjarabætur sem að eru umfram það sem að almennt svigrúm sé til í landinu. Við ætlum að bera ábyrgð á þessum samningi og stöndum við hann. Hann er til kominn vegna þeirra sérstöku aðstæðna sem að til umræðu hafa verið undanfarna mánuði og við þurfum við að bregðast við, við slíkar aðstæður.

„Það hefði ekki boðið upp á mikinn stöðugleika, ef að menn vilja ræða hann í þessu samhengi, að hafa þetta mál óleyst næstu mánuðina.“

Verkfallsaðgerðir lækna hafa verið kostnaðarsamar fyrir heilbrigðisstofnanir. Þannig áætlar Landspítalinn að kostnaður spítalans sé yfir fjögur hundruð milljónir vegna hátt í átta hundruð skurðaðgerða sem fella þurfti niður svo og til að mynda hjartaþræðinga og þeirra ríflega þrjú þúsund dag- og göngudeildartíma sem felldir voru niður.

Páll Matthíasson forstjóri Landspítalans á von á að það taki allt fram á haust að vinna niður þá biðlista sem myndast hafa.

„Ég hugsa að við þurfum ábyggilega lungað úr árinu í það. Það jákvæða í þessu öllu saman er að það er búið að semja og þar með erum við komin með tæki og möguleika til að sinna okkar hlutverki eins og við viljum sinna því.“

Heilbrigðisráðherra segir reynt verði að meta áhrif verkfallsaðgerðanna sem fyrst til að ákveða hvernig reynt verði að vinna niður biðlista sem mynduðust.

„Ég óskaði eftir því við landlæknisembættið að það myndi greina þessa stöðu. Áhrif verkfallsins á biðlista og aðgengi sjúklinga að heilbrigðisþjónustunni. Landlæknir er að vinna þá vinnu og þegar að hún liggur fyrir munum við setjast yfir það með hvaða ráðum hægt er að bregðast við,“ segir Kristján Þór Júlíusson, heilbrigðisráðherra.