Segja málsmeðferð rammaáætlunar ámælisverða

Samtök ferðaþjónustunnar segja málsmeðferð á þingsályktunartillögu varðandi áætlun um vernd og orkunýtingu landssvæða, svokallaða rammaáætlun, vera ámælisverða. Í tilkynningu frá samtökunum segir að miður sé að meirihluti atvinnuveganefndar Alþingis hafi gert breytingar sem gangi mun lengra en upprunaleg tillaga umhverfis- og auðlindaráðherra.

„Tillaga ráðherra byggði á niðurstöðum verkefnastjórnar 3. áfanga rammaáætlunar, sem gerði ráð fyrir að Hvammsvirkjun færi í orkunýtingarflokk. Atvinnuveganefnd leggur hins vegar til að auk Hvammsvirkjunar verði fjórir aðrir virkjanakostir færðir í nýtingarflokk. Þessir fjórir viðbótarvirkjanakostir hafa ekki allir lokið því ferli sem lög um rammaáætlun gera ráð fyrir.“

Þá kemur fram í tilkynningunni að í lögum um rammaáætlun sé skýrt kveðið á um verklag við vinnu á áætlun um vernd og orkunýtingu landssvæða. Að tilgangur og markmið áætlunarinnar hafi verið að ná ná víðtækri samfélagssátt.

„Vinnubrögð sem þessi eru hins vegar ekki til þess fallin að stuðla að slíkri sátt.“