Segir stjórnvöld standa að verðhækkunum

Stjórnvöld standa að verðhækkunum á mjólkurvörum sem eru allt að þrefalt hærri en almennt verðlag, segir Finnur Árnason, forstjóri Haga. Reynt sé að leyna neytendur þessum hækkunum.

Finnur gagnrýnir stjórnvöld harðlega fyrir að krefjast stöðugleika og lágrar verðbólgu um leið og óréttmætar hækkanir eru ákveðnar.

Opinber verðlagsnefnd búvara ákvað fyrir skömmu að heildsöluverð á mjólkurvörum og mjólkurafurðum skuli hækka þann 1. ágúst næstkomandi um tæp fjögur prósent, nema smjör sem hækkar um 11,6 prósent.

„Þetta er opinber nefnd á vegum ráðherra sem tekur ákvörðun um þessar hækkanir. Það er tekin ákvörðun um að hækka smjör um 11,6 prósent og það er vitnað til þess að það hafi ekki hækkað frá því í október 2013. Vísitalan frá þeim tíma og fram í síðasta mánuð hefur hækkað um 3,39 prósent þannig að þessi ákvörðun er rúmlega þreföld vísitöluhækkun,“ sagði Finnur í fréttum Stöðvar 2 í gærkvöldi.

Hann segir að stjórnvöld reyni að fela hækkanirnar fyrir neytendum. „Ráðuneytið er að tilkynna þetta á laugardegi um mitt sumar sem segir í raun allt sem segja þarf. Það er verið að fela hækkun sem er langt umfram það sem eðlilegt er.“