Vaka fór með sigur af hólmi

Vaka, félag lýðræðissinnaðra stúdenta, bar sigur af hólmi í kosningum til stúdentaráðs Háskóla Íslands 2015. Vaka fékk 17 menn kjörna af 27 stúdentaráðsfulltrúum en Röskva, samtök félagshyggjufólks við Háskóla Íslands fékk 10 menn kjörna.

• Á félagsvísindasviði fékk Vaka fimm menn kjörna og Röskva tvo.
• Á heilbrigðisvísindasviði fékk Vaka þrjá menn og Röskva tvo.
• Á hugvísindasviði fékk Vaka tvo og Röskva þrjá menn kjörna.
• Á menntavísindasviði fékk Vaka fjóra og Röskva einn.
• Á verkfræði- og náttúruvísindasviði fékk Vaka þrjá og Röskva tvo. 

Á kjörskrá voru 13.942. 6.014 greiddu atkvæði sem þýðir að kjörsókn var 43,14 prósent.

Vísir náði tali af Jóni Birgi Eiríkssyni, formanni Vöku, rétt eftir að úrslitin voru kveðin upp. Hann var, sem ber að skilja, alsæll yfir niðurstöðunum. 

„Það er ekki annað hægt en að vera glaður yfir þessu. Þetta var hörð barátta, báðar fylkingar voru mjög öflugar og málefnunum var komið vel á framfæri,“ sagði Jón Birgir.