Brennsluofn ekki í umhverfismat

Fyrirhuguð áform Kaupfélags Skagfirðinga þess efnis að setja upp brennsluofn sem gæti brennt allt að sex tonnum af sláturúrgangi á dag þarf ekki að fara í umhverfismat að mati Skipulagsstofnunar.

Kaupfélag Skagfirðinga fór þess á leit við heilbrigðiseftirlit Norðurlands vestra að breyta starfsleyfisskilyrðum sínum til að geta brennt sex tonn að hámarki á dag af áhættuvefjum og sýktum dýrahræjum og komast þannig hjá urðun eða kostnaðarsömum leiðum við förgun þeirra.

Það starfsleyfi er enn til kynningar hjá heilbrigðiseftirlitinu. Í upplýsingum frá framleiðanda ofnsins sem KS hefur hug á að kaupa er tekið fram að útblástursmælingar sýni að búnaðurinn uppfylli viðmið sem sett eru í Evrópulöggjöf um brennslu úrgangs.