Kókaínsmyglið í Sundahöfn enn óupplýst

„Við vonum auðvitað að þetta séu ekki okkar menn sem voru að standa í þessu,“ segir Ólafur William Hand, upplýsingafulltrúi Eimskips. Í lok júní fundust tæp þrjú kíló af kókaíni í gámi í Sundahöfn sem komið hafði með skipi Eimskips, Skógafossi.

Skipverjar voru allir yfirheyrðir af lögreglu en enginn þeirra var úrskurðaður í gæsluvarðhald. Enginn hefur stöðu grunaðs manns sem stendur. Skipið er nú á siglingu og ætti að vera í Argentíu á Nýfundnalandi í dag.

Aðspurður hvort það sé ekki íþyngjandi fyrir skipverja að allir og enginn sé grunaður segir Ólafur: „Það hlýtur að vera íþyngjandi ef þú ert sekur. En ef þú ert saklaus get ég ekki ímyndað mér að það hafi nein áhrif á þig.“

Hann segir að mikill fjöldi fólks komi að skipinu og hafi aðgang að farmi þess í hverri höfn. „Það er rosalega erfitt að benda á áhafnarmeðlim nema þú sért með óyggjandi sannanir fyrir því. Það er ekki öfundsvert fyrir lögregluna að rannsaka mál sem er svona óljóst.“

Aldís B. Hilmarsdóttir, aðstoðaryfirlögregluþjónn í fíkniefnadeild lögreglunnar á höfuðborgarsvæðinu, segir að málið sé enn í rannsókn. Aðspurð hvort málið sé tengt stærra fíkniefnamáli eða hafi verið einangrað smygl segir Aldís: „Við erum ekki komin með af eða á varðandi það.“

Uppfært

Í upphafi stóð að Skógafoss væri statt í Argentínu. Það er aftur á móti statt í Argentíu, sem er 450 manna bær á Nýfundnalandi. Það leiðréttist hér með.