Tónlist

Auglýsingasprengja fyrir Austurland

Gunnar Leó Pálsson skrifar
Talið er að um 2.200 manns á hátíðinni þegar að mest var.
Talið er að um 2.200 manns á hátíðinni þegar að mest var. Mynd/Freyja Gylfadóttir
„Við settum aðsóknarmet og þetta gekk rosalega vel,“ segir Stefán Magnússon, forsprakki tónlistarhátíðarinnar Eistnaflugs, sem fram fór um liðna helgi. Yfir tvö þúsund manns sóttu hátíðina í ár og var hún talsvert fjölmennari en undanfarin ár. „Þetta er að minnsta kosti 30 prósenta aukning á milli ára. Ég geri ráð fyrir að það hafi verið um 2.200 manns á hátíðinni þegar að mest var,“ segir Stefán alsæll en hann var að klára að sópa gólfið í tónleikasalnum þegar blaðamaður náði tali af honum.

Þær erlendu hljómsveitir sem komu fram í ár voru ákaflega ánægðar með hátíðina. „Erlendu böndin voru heilluð af hátíðinni og líka af landslaginu og náttúrunni hérna fyrir austan. Ónefndur erlendur hljómsveitarmeðlimur sagði við mig að þetta hefði verið í fyrsta skipti í marga mánuði sem það hefði verið gaman að spila á festivali,“ segir Stefán um erlendu böndin.

Aðstandendur Eistnaflugshátíðarinnar eru ekkert að grínast hvað varðar allan aðbúnað á hátíðinni. Tónleikarnir voru veisla fyrir augu og eyru.Mynd/Freyja Gylfadóttir
Eistnaflug hefur ávallt verið mikil kynning fyrir Austurland og segir Stefán að hátíðin í ár muni koma til með að vera ákveðin kynningarsprengja fyrir landið og Austurland sérstaklega. „Bara við vorum með um tíu erlenda blaðamenn sem við buðum. Þar fyrir utan komu örugglega um 20 til 30 aðrir erlendir blaðamenn og ljósmyndarar. Þetta voru allavega svona 40 tímarit, að lágmarki, sem voru hérna. Þannig að þetta er einhver rosalegasta kynning sem Austurland hefur fengið,“ segir Stefán.

Tónleikarnir fóru fram í íþróttahúsinu í Neskaupstað í fyrsta sinn en áður höfðu þeir verið haldnir í Egilsbúð. Það þýðir að mun fleiri gestir geta sótt hátíðina. „Hátíðin verður með þessu sniði, þú bakkar ekkert út úr þessu dæmi. Þetta á bara eftir að stækka.“

Rúmlega 500 útlendingar mættu á Eistnaflug í ár og segir Stefán að miðað við þá umfjöllun sem er að fara í gang erlendis, megi reikna með um 700 útlendingum á næsta ári, sem er talsverð aukning.

Stefán segir erfitt að finna hápunkt á hátíð sem þessari. „Tónleikarnir voru einn hápunktur, það er bara þannig,“ segir Stefán fullur tilhlökkunar fyrir næstu hátíð.

Tvö erlend bönd eru nú þegar bókuð á hátíðina á næsta ári þau Belphegor og Melechesh.

Veðrið lék á köflum við gesti hátíðarinnar.Mynd/Freyja Gylfadóttir
Rúmlega 500 útlendingar mættu á Eistnaflug í ár.Mynd/Freyja Gylfadóttir
Bubbi og Dimma stóðu sig með miklum sóma.Mynd/Freyja Gylfadóttir
Stefán Jakobsson og hljómsveitin Dimma fóru á kostum.Mynd/Freyja Gylfadóttir





Fleiri fréttir

Sjá meira


×