Lífið

Öll mín lög eru persónuleg fyrir mig

Gyða Lóa Ólafsdóttir skrifar
Líkt og vaninn er hjá Björk er mikið lagt í alla umgjörð í kringum plötuna.
Líkt og vaninn er hjá Björk er mikið lagt í alla umgjörð í kringum plötuna.
Platan Vulnicura með Björk Guðmundsdóttur kom út þann 20. janúar síðastliðinn. Vulnicura er áttunda sólóplata Bjarkar sem gefin er út af One Little Indian.



Plötunni lýsti Björk á heimasíðu sinni Bjork.com sem ástarsorgarplötu og sagði að það kæmi sér á óvart hversu nákvæm skráning hún væri á ferlinu. Þrjú lög fyrir sambandsslit og þrjú eftir en sambandið sem um ræðir var langtíma ástarsamband Bjarkar við listamanninn Matthew Barney.



En mætti þá segja að Vulnicura væri ein af hennar persónulegustu plötum til þessa? „Já, ef til vill, en mér finnst lög eins og til dæmis Dark Matter með engum texta af Biophilia mjög persónulegt. Það var samið um dauða ömmu minnar sem var mér mjög kær. Hún var frekar svona introvert þannig að það á vel við,“ segir Björk og bætir við að öll hennar lög séu frekar persónuleg fyrir sig.



Í kjölfar útgáfu Vulnicura fór Björk í röð viðtala á miðlum eins og til dæmis Pitchfork. Þar talaði hún um ferlið á bak við sköpun plötunnar en passaði sig jafnframt á að minnast ekki á persónulega hluti sem lutu að skilnaðnum. „En ég talaði því meira um heilun mína og einbeitti mér bara að ferlinu mínu,“ segir hún.



„Mér finnst við allar plötur sem ég hef gert að ég hafi farið í gegnum ferli. Til dæmis Homogenic, þá var ég á Spáni að reyna að defínera hvað er íslensk tónlist en á sama tíma glóbal,“ segir hún en platan Homogenic kom út árið 1997 og fékk prýðisgóðar viðtökur. Rolling Stone gaf henni meðal annars fjórar stjörnur af fimm.



Síðasta plata Bjarkar á undan Vulnicura, Biophilia, kom út árið 2011 og segir Björk umfjöllunarefni hennar persónulegt.



„Biophilia var kannski um hvar við stöndum í alheiminum og í samhenginu tækni og náttúra, sem mér finnst mjög persónulegt.“

Björk segir texta sína oft og tíðum fjalla á einhvern máta um ástina, enda hefur sú tilfinning verið mörgum listamönnum yrkisefni í gegnum tíðina.



„Textarnir mínir eru nú svona oftast um ást,“ segir hún og bætir við: „Hvort sem það er verið að tala um kristalla eða sjálfstæðisbaráttu.“



Björk hefur í mars og apríl haldið sex tónleika í New York. Tónleikahald heldur áfram í sumar og kemur hún tvisvar sinnum fram á Iceland Airwaves-hátíðinni. Aðdáendur Vulnicura og Bjarkar mega eiga von á að platan verði flutt í heild.



„Mig langar rosalega að spila hana með sömu hljóðfæraleikurunum og eru á plötunni, Unu Sveinbjarnar og félögum, svo við munum líklegast spila plötuna frá A til Ö.“



Björk segir tónleikana á Íslandi sér mikilvæga. „Alltaf langmikilvægustu tónleikarnir fyrir mig, þess vegna geri ég þá oftast seinna á túrnum svo allt sé orðið slípað,“ segir hún og biður að lokum fyrir kveðju heim til Íslands.



Hér má sjá tónlistarmyndband Bjarkar við lagið Lionsong




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.