Ráðherra eigi að gefa út kvóta

Í erindi Félags atvinnurekenda (FA) til atvinnuvegaráðuneytisins er farið fram á að ráðgjafarnefnd um inn- og útflutning landbúnaðarafurða verði kölluð saman vegna yfirvofandi verkfalls dýralækna frá og með næstkomandi mánudegi.

Í bréfinu er vísað til fréttar Fréttablaðsins í gær um að slátrun muni stöðvast í verkfallinu og að þá sé stutt í skort á svína-, kjúklinga- og nautakjöti í verslunum.

Ólafur Stephensen, framkvæmdastjóri FA, bendir í bréfinu á að landbúnaðarráðherra beri, samkvæmt 65. grein búvörulaga, skylda til að gefa út opinn innflutningskvóta á lægri tollum, þegar framboð búvöru er ekki nægjanlegt á innanlandsmarkaði.

„Félag atvinnurekenda fer þess á leit við ráðuneytið að það kalli saman ráðgjafarnefnd um inn- og útflutning landbúnaðarafurða og nefndin undirbúi að gefa þegar í stað út opinn tollkvóta fyrir fjölbreytilegt úrval nauta-, alifugla- og svínakjöts, komi til verkfalls,“ segir í bréfinu. Með skjótum viðbrögðum nefndarinnar og ráðherra megi afstýra kjötskorti og tryggja fæðuöryggi landsmanna. „Aðgerðaleysi stjórnvalda mun á hinn bóginn, að óbreyttu, valda skorti á nauðsynlegum matvælum, skerða lífsgæði og skaða allan almenning í landinu.“