Paul Ramses opnar grunnskóla í Kenía

„Við seljum handgerða hluti í Kolaportinu til að safna fyrir skólanum,“ segir Paul Ramses Qduor sem stefnir að því að opna grunnskóla fyrir 320 börn í Kenía næsta ágúst. Paul og kona hans, Rosemary Atieno, fengu pólitískt hæli hér á landi árið 2010 eftir tveggja ára baráttu.

Í Kolaportinu stendur Ramses vaktina allar helgar og selur listmuni sem búnir eru til af konum sem búa á heimilum sem þau hjón reka í Kenía.

Hjónin stofnuðu góðgerðafélagið Tears Children and Youth Aid árið 2010 með hjálp vina á Íslandi. Félagið leggur áherslu á að veita munaðarleysingjum, ósjálfbjarga börnum, ungmennum og konum á jaðri samfélagsins í Kenía menntun og aðra aðstoð til sjálfshjálpar. Skólinn á að vera fyrir fátæk börn og unglinga og skapa skjól fyrir munaðarlaus börn og einstæðar mæður.

„Við höfum nú þegar byggt leikskóla fyrir 150 munaðarlaus börn,“ segir Paul Ramses.