Skrifuðu undir nýjan samning

Atkvæðagreiðslu um nýjan kjarasamning vegna ríkisrekinna framhaldsskóla á að vera lokið eigi síðar en 15. þessa mánaðar. Fulltrúar Kennarasambands Íslands (KÍ) og samninganefndar ríkisins skrifuðu undir samninginn í gærmorgun.

Félagsmenn Félags framhaldsskólakennara (FF) og Félags stjórnenda (FS) í ríkisreknum framhaldsskólum felldu í febrúar samkomulag um nýtt vinnumat og þar með voru samningar þeirra lausir.

„Könnun meðal félagsmanna leiddi hins vegar í ljós að 76 prósent þeirra voru fylgjandi því að gengið yrði á ný til samninga á grundvelli vinnumatsins,“ segir í tilkynningu KÍ.

Þar er haft eftir Guðríði Arnardóttur, formanni FF, að nýtt samkomulag sé í helstu atriðum líkt hinu fyrra, en nú sé búið að jafna mun á milli greina, styrkja ramma utan um ráðningarhlutföll og tryggja að sýnidæmi vinnumats gildi sem lágmarksviðmið.