Staðfestu nálgunarbann yfir eiginmanni

Hæstiréttur staðfesti ákvörðun lögreglustjórans á höfuðborgarsvæðinu um að maður skyldi sæta brottvísun af heimili og nálgunarbanni við eiginkonu sína og son hennar, í fjórar vikur. Áður hafði héraðsdómur Reykjavíkur hafnað kröfu lögreglustjórans meðal annars á þeim forsendum að aðeins væri um eitt alvarlegt tilvik að ræða en „í hin skiptin verður ekki betur séð en um hjónaerjur sé að ræða“, segir í dómi héraðsdóms. Taldi dómurinn vegna þessa að ekki væru lagaskilyrði fyrir nálgunarbanninu.

Forsaga málsins er sú að lögregla hafði í nokkur skipti frá því í maí í fyrra verið kölluð að íbúð hjónanna vegna heimilisófriðar. Segir í dómnum að nágrannar hafi hringt í lögreglu vegna láta og að konan hafi oft þurft að flýja fram á gang vegna hræðslu við hann. Í eitt skipti þegar lögregla var kölluð til þá var maðurinn með hníf í hendi og sögðu eiginkonan og sonur hennar að maðurinn hefði otað hnífnum að þeim og hótað þeim. Í dómnum kemur fram að konan hafi ekki kært atvikið af ótta við að hún missti dvalarleyfi sitt hér á landi í kjölfarið. Farið var fram á nálgunarbannið 9. mars en sterkur grunur leikur á að maðurinn hafi sparkað í bak konunnar tveimur dögum áður.