Ísland og Noregur í fimmta og sjötta sæti

Ísland og Noregur deila fimmta og sjötta sæti yfir þau Evrópulönd þar sem íbúarnir eru hvað ánægðastir með lífið.

Þetta kemur fram í samantekt sem Eurostat, evrópska hagstofan, birti í gær upp úr könnun sem framkvæmd var í velflestum löndum Evrópu árið 2013.

Greiningin er byggð á þremur þáttum þar sem fólk metur ánægju sína með tilveruna á skalanum 0 til 10. Efstu fjórum sætunum með einkunnina átta deila Danmörk, Finnland, Sviss og Svíþjóð. Á Íslandi og í Noregi var einkunnin 7,9.

Spurningalistar voru lagðir fyrir fólk þar sem það var beðið að meta ánægju sína með lífið í heild, jákvæðar og neikvæðar tilfinningar til tilverunnar og að síðustu lífsfyllingu sína, eða hvort því þætti tilveran hafa tilgang.

„Á skalanum 0 til 10 gáfu nærri 80 prósent Evrópubúa lífi sínu í heild einkunn yfir 6 á árinu 2013,“ segir í umfjöllun Eurostat. „Sem endurspeglar meðalánægju upp á 7,1“. 

Lægsta einkunnin var í Búlgaríu, 4,8, en þar fyrir ofan komu í næstu sætum Portúgal, Ungverjaland, Grikkland og Kýpur, öll með einkunnina 6,2. 

„Konur og karlar stóðu nærri því jafnt í ánægju sinni og yngri borgarar Evrópusambandsins voru ánægðari en aðrir aldurshópar. Atvinnulausir og óvirkir voru að jafnaði óánægðastir með lífið (5,8) miðað við fólk í fullu starfi (7,4) eða fólk í námi eða starfsþjálfun (7,8), sem gaf lífi sínu hæstu einkunnina.“ 

Eurostat segir að sá þáttur sem helst hafi orðið til þess að draga úr lífsánægju fólks hafi verið bág heilsa.