Buðu 110 milljónir í golfvöll í Grímsnesi

Ófullgerður golfvöllur sem Grímsnes- og Grafningshreppur keypti á árinu 2011 er enn í höndum sveitarfélagsins.

Síðast fyrir mánuði hafnaði sveitarstjórnin tilboði í völlinn sem hefur verið á söluskrá í tvö ár.

Í tilboði Örvars B. Hólmarssonar hjá Minni-Borgum sagði að kaupandi myndi greiða 110 milljónir króna „í síðasta lagi eftir tíu ár frá undirritun kaupsamnings“ en að hann gæti líka borgað hvenær sem er á tímabilinu „komi þær aðstæður upp“.

Grímsnes- og Grafningshreppur eignaðist golfvallarsvæðið í júní 2011. Völlurinn var þá keyptur fyrir um 55 milljónir króna af Sparisjóðabankanum sem leyst hafði hann til sín frá félaginu Golfborgum sem komið var í þrot. Að Golfborgum stóðu sömu einstaklingar og nú reka gisti- og veitingaþjónustuna Minni-Borgir.

„Við höfum verið að reyna að komast yfir þennan völl aftur,“ segir Einar Þorsteinsson hjá Minni-Borgum. Að sögn Einars er völlurinn í niðurníðslu. Nú vilji Minni-Borgarmenn fullgera tólf holu golfvöll og efla þannig afþreyingarmöguleika á svæðinu.

Auk fyrrnefndra 55 milljóna í kaupverð hefur hreppurinn lagt nærri aðra eins upphæð í framkvæmdir á svæðinu að sögn Ingibjargar Harðardóttur sveitarstjóra. „Þetta var náttúrlega bara moldarflag allt saman og við keyptum þetta bara til að loka því,“ segir Ingibjörg og útskýrir að ekki hafi staðið til af hálfu sveitarfélagsins að ljúka gerð golfvallarins.

„En af því að þarna voru uppi ýmsar hugmyndir þá lokuðum við þessu ekki sem landi heldur sem golfvelli á meðan verið var að spá í þetta. Við sléttum síðan úr þessu í fyrrasumar og lokuðum. Það er ekki búandi á svæðinu með moldrok yfir sér alla daga,“ segir Ingibjörg sem kveður nokkur tilboð hafa borist sem öllum hafi verið hafnað.

Reyndar segir sveitarstjórinn ekki gert ráð fyrir því á fjárhagsáætlunum hreppsins út árið 2018 að selja landið þótt það sé á söluskrá. „Á Borg er þéttbýliskjarninn okkar og þetta er ríflega 55 hektara gott byggingarland. En er ekki flest til sölu ef það er boðið vel í?“

Einar kveður hreppinn hafa fengið mat fasteignasala sem telji völlinn 150 milljóna króna virði. „Þetta er bara einhver græðgi því þeir vita að eftir tvö til þrjú ár verður völlurinn einskis virði – bara orðinn einhver mói,“ metur Einar stöðuna.

Golfarar kærðu golfvöllinn

Eftir að Grímsnes- og Grafningshreppur eignaðist golfvöllinn á Minni-Borg og ákvað að setja fé í að ljúka gerð hans kærðu Golfklúbbur Öndverðarness og Golfklúbbur Kiðjabergs þá ákvörðun til innanríkisráðuneytisins.

Sögðu klúbbarnir samþykkt sveitarstjórnarinnar um uppbyggingu golfvallar í samkeppni við íþróttafélög í sveitarfélaginu ekki fullnægja því almenna viðmiði sveitarstjórnarlaga að teljast sameiginlegt velferðarmál íbúa sveitarfélagsins.

Innanríkisráðuneytið hafnaði kröfum klúbbanna með úrskurði í apríl 2013. Það hafi verið mat sveitarfélagsins að hagkvæmara væri að ljúka gerð vallarins heldur en að koma landinu aftur í upprunalegt horf. Þess utan lægi engin ákvörðun fyrir um það að hreppurinn myndi reka golfvöllinn þegar hann yrði tilbúinn til notkunar.