Vindmyllurnar langt yfir heimsmeðaltali

Vindmyllur Landsvirkjunar á Hafinu svokallaða fyrir ofan Búrfell skila nýtingu sem er langt yfir heimsmeðaltali. Þær hafa verið í rekstri frá febrúar 2013, en reksturinn hefur verið umfram væntingar og nú hefur komið í ljós einstaklega góð nýting á fyrsta heila rekstrarári.

Á heimsvísu er nýtnihlutfallið, sem er einn helsti mælikvarði á hagkvæmni staðsetningar, að meðaltali um 28 prósent. Nýtnihlutfall vindmylla Landsvirkjunar var 44 prósent á árinu 2014. Þetta staðfestir að miklir möguleikar eru á frekari raforkuvinnslu úr vindorku á svæðinu, segir í frétt Landsvirkjunar. Rekstrarlegt tiltæki hefur verið tæplega 99 prósent fyrir aðra vindmylluna og tiltæki hinnar um 97,5 prósent árið 2014, sem sýnir hversu áreiðanlegar vindmyllurnar eru í rekstri.

Tvö svæði hafa verið til frekari skoðunar af hálfu Landsvirkjunar fyrir mögulega framtíðaruppbyggingu: þar sem rannsóknarvindmyllurnar tvær eru nú á Þjórsár- og Tungnaársvæðinu og einnig á virkjanasvæði Blöndustöðvar. Tillaga að áætlun mats á umhverfisáhrifum fyrir Búrfellslund liggur fyrir.