Kanadamávar í gestahlutverki í fuglastríði íbúanna á Álftanesi

„Mér þykir mjög leitt ef þetta angrar einhvern,“ segir Brynja Valsdóttir sem um árabil hefur gefið hröfnum á Bessastaðatúninu á Álftanesi.

Þótt Brynja hafi fengið þakkir í Facebook-hópi íbúa á Álftanesi eru ekki allir sáttir.

„Gætuð þið hugsað ykkur að fara aðeins fjær byggðinni með þessa matargjöf því þetta er frekar hvimleitt að vakna upp við gargið í varginum fyrir allar aldar,“ skrifar til dæmis Bylgja Baldursdóttir sem býr við Suðurtún, í ávarpi á Facebook.

Brynja kveðst hafa gefið hröfnum á morgnana á Bessastaðatúni að vetrarlagi í áraraðir. Í óveðrum að undanförnu hafi hún gefið gæsum nærri byggðinni. Mávur og hrafn hafi sótt í það æti.

Bjartmávur frá Kanada sækir í gæsabrauð

„Gæsirnar sækja í brauð sem ég gef smáfuglum í garðinum mínum og ég hef því hent brauði á tún handan við veginn til að lokka þær þangað. Ef það er að angra einhvern þá skil ég það og mun hætta því,“ segir hún.

Í vetur hefur bjartmávur sem Brynja segir farfugl frá Kanada bæst í hópinn. „Hann er venjulega á Breiðafirði og annars staðar en þar hefur orðið ætishrun,“ útskýrir hún.

Óþarft að draga varginn að byggðinni

Bylgja Baldursdóttir segir í fyrrnefndu ávarpi á Facebook halda að vera „vargsins“ svo nærri byggð hafi slæm áhrif á smáfugla sem fólk vilji gjarnan gefa í görðum sínum.

„Persónulega þá finnst mér algjör óþarfi að draga varginn nær byggð í ljósi þess að hann er alveg skelfilegur þegar kemur að ungatímabili smáfuglanna,“ skrifar Bylgja.

Brynja bendir hins vegar á að Kanadamávurinn sé sjófugl sem verði farinn fyrir vorið.

Guð launar fyrir hrafninn

Að sögn Brynju kemur hrafninn langt að úr næturskjóli sínu. „Hrafnarnir eru vinir mínir og bíða þarna á morgnana eftir að fá matinn. Tíðin í vetur hefur verið skelfileg fyrir alla fugla. Menn hafa gjarnan flokkað þá í góða fugla og vonda og gefa sumum en öðrum ekki. Sumir þeirra geta betur bjargað sér en smáfuglarnir eru algerlega háðir matargjöfum núna,“ segir Brynja og bendir á að Álftanes sé fuglasvæði. „Mávurinn er væntanlega þarna hvort sem hann étur úr ætinu sem ég gef hröfnum eða ekki. Ég get ekki sorterað mávana úr.“

Brynja bætir við að þúsundir manna á höfuðborgarsvæðinu gefi fuglum mat. „Guð launar fyrir hrafninn.“