Ýtt af bótaskrá og fer í mál við ríkið

Einn atvinnuleitandi sem er dottinn út af atvinnuleysisskrá hefur ákveðið að sækja rétt sinn fyrir dómstólum.

Sá hinn sami missti rétt sinn um áramót við það að bótatíminn var styttur úr þremur árum í þrjátíu mánuði.

Lögmaður atvinnuleitandans, Gísli Tryggvason, segir hann hafa orðið fyrir tjóni og að lagasetningin standist ekki ákvæði stjórnarskrárinnar. „Við teljum að í löggjöfinni sé með of skömmum fyrirvara ákveðið að stytta rétt sem er lögvarinn og áunninn og hún standist því ekki stjórnarskrána.“

Um 500 manns misstu bótaréttindi sín um áramót og kanna rétt sinn á fjárhagsaðstoð. Hugsanlega eiga þeir ekki allir rétt á fjárhagsaðstoð þar sem henni eru settar þrengri skorður. Eignastaða viðkomandi atvinnuleitanda getur skipt máli og skert bætur eða orðið til þess að þeim er synjað um fjárhagsaðstoð. Þá getur eignastaða maka skipt máli.

„Aðstæður þessa atvinnuleitanda eru óviðunandi. Hann missir rétt sinn með stuttum fyrirvara. Hann er að kanna sinn rétt á fjárhagsaðstoð hjá sveitarfélaginu þar sem hann býr. Eftir þá könnun kemur í ljós hvað tjón hans er mikið. Það er alveg ljóst að það er tjón, en hversu mikið veit hann ekki,“ segir Gísli og segir dómkröfuna munu snúast um tjónið eða viðurkenningu á því að lögin séu óskuldbindandi gagnvart honum.

Gísli telur ekki hægt að afnema með svo skömmum fyrirvara áunninn rétt sem hefur verið tryggður í lögum alllengi. Þá vísar hann bæði til eignarréttarákvæðis stjórnarskrárinnar og ekki síður 76. greinar hennar sem kveður á um að öllum skuli tryggður réttur í lögum, til að mynda vegna atvinnuleysis. Þá sé ákvörðunin íþyngjandi.

Eygló Harðardóttir félagsmálaráðherra hefur sagt áformin hafa legið fyrir í töluvert langan tíma.

Frumvarpið hafi verið kynnt í haust. „Alþingi samþykkti lögin samhliða tekjuhlið fjárlagafrumvarpsins, þar var náttúrulega farið í gegnum áhrifin og það var einnig farið í gegnum hvað við værum að gera og niðurstaða Alþingis var að samþykkja þetta og það telur að sjálfsögðu að það standist lög,“ sagði Eygló Harðardóttir í samtali við Stöð 2 30. desember síðastliðinn.

Gísli segir umræddan atvinnuleitanda ekki hafa efni á því að kosta málið vegna slæmrar stöðu sinnar. En hann vonist til að leysa það mál. „Næsta verkefni þessa atvinnuleitanda er að leita til stéttarfélagsins eða sveitarfélagsins til að kosta þetta mál því hann hefur engin ráð til þess.“