Það bíða engin störf eftir fötluðu fólki

Halldór Þór Þórhallsson fyrrverandi deildarstjóri hjá Ferðaþjónustu fatlaðra segir svarta skýrslu um ferðaþjónustu strætó staðfestingu á því að það hafi verið framið skemmdarverk.

Menn hafi ekki hlustað á þá sem höfðu yfirsýn og reynslu og nær 200 ára reynslu hafi verið hent út um gluggann með þeirri höfnun sem því fylgdi. Það hafi verið hræðilegt að upplifa tímann í kringum breytingarnar.

Ný svört skýrsla um ferðaþjónustu fatlaðra þykir mikil uppreisn æru fyrir þá starfsmenn sem sagt var upp eftir að Strætó tók við rekstrinum.

Halldór Þór segir að sorglegasta skemmdarverkið sem framið var gagnvart starfsfólkinu hafi verið uppsögn þriggja fatlaðra starfsmanna í þjónustuverinu.

Ingi Steinn Gunnarsson, einn þeirra, undirbýr málshöfðun gegn Strætó vegna uppsagnanna en hann hafði unnið í áratugi fyrir ferðaþjónustuna. „Fyrirtækið sinnti ekkert um að gæta meðalhófs og meta starfshæfni okkar, með tilliti til þess að færa fólk í önnur störf hjá fyrirtækinu eins og þeim bar að gera,“ segir Ingi Steinn.

Þjónustan ekki batnað mikið

Ingi Steinn segist ánægður með skýrsluna. Hún staðfesti allt sem hann og fleiri hafi haldið fram. Hann hefur ekki fengið vinnu síðan fremur en hinir fötluðu starfsmennirnir. „Það bíða ekki störf eftir fötluðu fólki eða fötluðu fólki í hlutastörfum í þjóðfélaginu, það er alveg ljóst,“ segir Ingi Steinn.

Ásta Dís Guðjónsdóttir formaður Sjálfsbjargar á höfuðborgarsvæðinu segir að fólk kvarti minna en þjónustan hafi lítið batnað. „Mér skilst að þjónustan hafi ekki batnað jafn mikið og þeir vilja vera að láta. Heldur hafi fólk þreyst á að kvarta. Því finnst ekki á það hlustað og hugsar bara, til hvers að kvarta, þegar það breytist ekkert.“