Dómurum ekki skipt út í nauðgunarmáli

Hæstiréttur hefur hafnað kröfu manns sem ákærður er fyrir nauðgun um að héraðsdómarar í málinu víki sæti.

Krafan kemur í kjölfar þess að Hæstiréttur ómerkti í mars síðastliðnum 4 ára dóm yfir manninum sem féll í júní á seinasta ári. Var dómur héraðsdóms ómerktur „vegna verulegra annmarka á samningu dómsins og þess að nafngreint vitni gaf ekki skýrslu fyrir dómi.“

Þegar málið var svo aftur tekið fyrir í héraði tveimur vikum eftir ómerkingu var farið fram á að héraðsdómararnir færu úr dómnum vegna vanhæfis. Var á því byggt að að „héraðsdómarar sem dæmdu málið í upphafi hafi nú þegar lagt mat á framburði ákærða og vitna í málinu og um leið sakfellingu ákærða.“

Þessu hafnaði héraðsdómur á grundvelli þess að Hæstiréttur víkur hvergi að því í dómi sínum um ómerkingu að niðurstöðu héraðsdóms um sönnunargildi munnlegs framburðar og hvort mat á þeim kunni að hafa verið rangt af hálfu dómara í málinu.

Undir þetta tekur Hæstiréttur en vísar þó aðallega til þeirrar meginreglu sakamálaréttarfars að héraðsdómari er ekki bundinn af fyrri úrlausn sinni í málinu. Þá hafði ekki verið bent á önnur atvik eða aðstæður sem gætu verið til þess fallnar að draga óhlutdrægni dómaranna í efa.