Menning

Rektor veitir loksins málverki af píku viðtöku

Birgir Olgeirsson skrifar
Jón Atli Benediktsson, rektor HÍ, með málverkið góða sem Stefanía Pálsdóttir málaði.
Jón Atli Benediktsson, rektor HÍ, með málverkið góða sem Stefanía Pálsdóttir málaði. Vísir/GVA
Rektor Háskóla Íslands , Jón Atli Benediktsson, veitti málverki Stefaníu Pálsdóttur viðtöku í dag. Verkið málaði Stefanía fyrir um ári síðan sem mótvægi við öllum þeim fjölda listaverka af berrössuðum karlmönnum sem er í Háskóla Íslands. Þessum listaverkum af berrössuðum karlmönnum fylgir að sjálfsögðu vænn skammtur af getnaðarlimum karlmanna og var Stefanía þeirrar skoðunar að skólinn þyrfti að eignast listaverk þar sem nekt kvenna er í fyrirrúmi.

Rektor var hæstánægður með verkið að sögn Stefaníu. Vísir/GVA
Stefanía hafði árangurslaust reynt að afhenda fyrrverandi rektor Kristínu Ingólfsdóttur málverkið. Þegar Jón Atli var í miðri kosningabaráttu fyrir rektorskjör fyrr í ár hafði hann verið spurður hvort hann vildi veita verkinu hennar Stefaníu móttöku. „Það var gert meira í gríni en alvöru, en hann lofaði því og minntist á það núna þegar hann tók á móti því,“ segir Stefanía.

Áður en málverkið leit dagsins ljós ætlaði Stefanía að rita greinina „fallus á campus“. „En síðan langaði mig svo mikið að mála mynd af píku og gefa þeim,“ sagði Stefanía við Vísi um málið í mars síðastliðnum.



Stefanía kláraði BA-gráðu í heimspeki og ritlist síðastliðið vor en stundar nú nám við myndlistarskólann í Reykjavík.


Tengdar fréttir






Fleiri fréttir

Sjá meira


×