Ástfangnir af föngum þótt reglur banni það

„Því miður kemur þetta upp annað slagið og við lítum þetta mjög alvarlegum augum. Yfirleitt er um að ræða fangaverði sem starfa við afleysingar,“ segir Páll Winkel fangelsismálastjóri um ástarsambönd fanga og fangavarða.

Nýlega kom upp tilvik í fangelsinu að Sogni þar sem kvenkyns fangavörður og fangi urðu ástfangin. Fangavörðurinn var sumarstarfsmaður og eftir að störfum lauk lét hún fangelsisyfirvöld vita af því að hún myndi halda áfram að heimsækja fangann. Þau eru saman í dag.

„Það kom upp tilvik í fyrra. Hún vildi eiga áfram í samskiptum við fangann og við ráðum engu eftir að störfum lýkur,“ segir Páll. 

Hann segir að yfirleitt gruni samstarfsfólk að fangavörður og fangi eigi í ástarsambandi ef sú er raunin og þá sé gripið inn í um leið. „Í þessu tilviki grunaði engan neitt og þetta kom öllum á óvart.” 

Páll mætir á nýliðanámskeið sem Fangavarðaskólinn heldur ár hvert og brýnir fyrir nýliðum að persónulegt samband við fanga sé óheimilt.

„Ég mæti til þess að ræða þetta og svo fara sálfræðingar yfir samskipti fangavarða og fanga. Við förum yfir tilvikin sem hafa komið upp og útskýrum að það sé á engan hátt í lagi,“ segir Páll og bætir við að yfirleitt komist upp um samböndin eftir að viðkomandi fangavörður er hættur störfum. 

„Það er erfitt að eiga við ástina og það er bara þannig að ungt fólk sem þekkir lítið til í þessum geira virðist sjá einhverja spennu í þessu, eins ótrúlega og það hljómar.“

Fangelsismálastofnun lítur persónulegt samband fanga og fangavarða alvarlegum augum og reynir eftir fremsta megni að koma í veg fyrir að samskiptin séu óviðeigandi. „Það er ekki viðeigandi að fangavörður eigi slík tengsl við skjólstæðing sinn.“

Margrét Frímannsdóttir, yfirmaður í fangelsinu að Litla-Hrauni, segir að ef starfsmaður og fangi verði of náin sé viðkomandi starfsmaður látinn víkja. 

„Það er brot og það samrýmist ekki þessu starfi,“ segir Margrét og bætir við að varðstjórar og aðstoðarvarðstjórar fylgist vel með því þegar nýtt starfsfólk hefur störf í fangelsinu. „Þeir fylgjast með hvort það sé minnsti grunur um óhefðbundin samskipti við fanga.“