„Ef hún vildi ekki að um þetta væri fjallað hefði hún átt að sleppa því að tússa bílinn“

Aðalmeðferð í meiðyrðamáli Ásgerðar Jónu Flosadóttur, formanns Fjölskylduhjálpar, gegn Reyni Traustasyni, fyrrverandi ritstjóra DV fór fram í Héraðsdómi Reykjavíkur í dag.

Málið snýst um frétt í DV í júlí 2013 þar sem fullyrt var að Ásgerður hafi verið kærð fyrir eignaspjöll og fyrir að hafa tússað á bíla, en ummælin voru höfð eftir viðmælanda blaðsins sem var nágranni Ásgerðar. Ásgerður hefur viðurkennt að hafa tússað á rúðu annars bílsins en hún var orðin langþreytt á að nágrannarnir lögðu bifreiðum sínum í einkastæði hennar.

Segja að Ásgerður hafi tússað á tvo bíla

Tvö vitni voru kölluð fyrir dóminn í dag, annars vegar konan sem á bílinn sem tússað var á og hins vegar sonur hennar sem var á bílnum þegar Ásgerður tússaði á hann. Fram kom í máli þeirra beggja að tússað hefði verið á tvo bíla, bíl konunnar og svo vinnubíl sem sonur hennar var á.  

Konan leitaði til lögreglu í kjölfarið og sagðist fyrir dómi í dag hafa kært Ásgerði fyrir eignaspjöll, líkt og haldið var fram í DV. Hún gaf meðal annars skýrslu hjá lögreglu um málið sem einnig kom á staðinn og myndaði bílana.

Rannsókn málsins var hins vegar hætt og það aldrei formlega kært en fyrir dómi í dag var meðal annars deilt um notkun orðsins „að kæra“, hvort Ásgerður hefði framið eignaspjöll og hvort hún væri opinber persóna.

Ásgerður ekki opinber persóna?

Lögmaður Ásgerðar, Vilhjálmur H. Vilhjálmsson, hélt því fram að málið hefði aldrei verið kært til lögreglu heldur aðeins tilkynnt. Því bæri að ómerkja ummælin „Kærð fyrir að tússa á bíla“ og „Kærð fyrir eignaspjöll“ þar sem það væri ekki rétt.

Þá hefði Ásgerður ekki framið nein eignaspjöll enda sé þar um refsiverða háttsemi að ræða. Lögreglan hafi því átt að halda áfram með málið sem hún gerði ekki og því hafi „fréttaflutningur DV verið byggður á sandi.“

Þá hélt Vilhjálmur því fram að þetta framferði Ásgerðar hefði ekki átt neitt erindi við almenning þar sem hún væri ekki opinber persóna.

Hvað þýðir orðið „að kæra“?

Katrín Smári Ólafsdóttir, lögmaður Reynis Traustasonar, mótmælti þeirri fullyrðingu að málið hefði ekki verið kært. Sögnin „að kæra“ merkti til dæmis það að tilkynna til lögreglu að refsivert brot hafi verið framið.

Þar af leiðandi hafi eigandi bílsins talið sig vera að kæra Ásgerði, eins og haft var eftir viðmælanda DV í umræddri frétt. Þá hafi jafnframt verið framin eignaspjöll þar sem það kostaði bæði fé og fyrirhöfn að þrífa tússið af bílunum, en nágranni Ásgerðar bar fyrir dómi að tússið hafi aldrei náðst alveg af bíl sínum.

Þá sagði Katrín að þó  Ásgerður væri ekki opinber persóna í hefðbundnum skilningi þá hefði hún engu að síður stigið inn í kastljós fjölmiðla sem formaður Fjölskylduhjálpar.

„Hún þarf því að þola að um þetta sé fjallað. Ef hún vildi ekki að um þetta væri fjallað hefði hún átt að sleppa því að tússa bílinn,“ sagði Katrín.

Því ber að halda til haga að upphaflegri frétt DV var breytt í netútgáfu blaðsins. Þá var upphaflega fréttin líka leiðrétt í janúar 2014 með fyrirsögninni „Ásgerður Jóna er saklaus“.