Gífuryrtur upplýsingafulltrúi gerir Grindvíkinga gráhærða

Hjálmar Hallgrímsson, sem er forseti bæjarstjórnar Grindavíkur, hefur farið fram á það að Siggeir Ævarsson upplýsingafulltrúi verði fjarlægður þegar bæjarstjórnarfundir eru haldnir. Þetta erindi hefur hann lagt fram og beinir til bæjarstjóra og formanns bæjarráðs.

Siggeir er að margra mati gífuryrtur mjög á Facebooksíðu sinni og það sem einkum stendur í Hjálmari, og reyndar fleiri Grindvíkingum, eru ummæli sem eru á þá leið að hann leggi það að jöfnu að vera barnamorðingi og vilja ekki koma flóttafólki til hjálpar.

Víkurfréttir greina frá málinu en í samtali við Vísi segir Hjálmar að sér sé slétt sama hvað menn gera á Facebooksíðum og manna á milli. „En, að stilla þeim upp við hlið barnamorðingja sem eru eru tiltekinnar afstöðu til flóttamanna tel ég of mikið sagt.“

Til stendur að Siggeir haldi áfram störfum fyrir bæinn

Siggeir kaus að tjá sig ekki um málið þegar Vísir falaðist eftir hans sjónarmiðum, en vísaði þess í stað á bæjarstjórann Róbert Ragnarsson, sem var að koma af fundi bæjarstjórnarmanna á Mývatni þegar Vísir náði í hann. Róbert telur þetta ekki óleysanlegan vanda, þetta sé eitthvað sem fólk leysir sín á milli.

„Þetta hefur í sjálfu sér ekkert með hans störf fyrir Grindavíkurbæ að gera. Siggeir heldur áfram að sinna sínum störfum eftir sem áður.“ Bæjarstjórinn bendir á að téð ummæli hafi fallið 3. september en bæjarstjórnarfundurinn þar sem flóttamannavandinn var ræddur var haldinn 29. september. Þetta sé því almennt athugað hjá Siggeir. Þá telur Róbert þá tvo hafa rætt málin og þetta sé leyst í hans huga.

Engin afsökunarbeiðni liggur fyrir

En, svo er þó ekki ef marka má hljóðið í Hjálmari. Hann segir þetta vissulega svo að honum hafi verið sýnt útprent af þessum ummælum eftir fundinn, og ummælin hafi fallið áður. En, það breyti engu í sínum huga. Engin afsökunarbeiðni liggi fyrir frá Siggeir, heldur réttlætingar á þessum ósmekklega samanburði. Hjálmar hefur því ekki dregið í land með kröfu sína. „Að hvaða leyti er þetta leyst? Ég fatta það ekki? Þessi er staðan. Það hefur ekki verið fundað neitt um þetta.“

Hjálmar segir að til standi að funda í dag klukkan fjögur og hann gerir ráð fyrir því að málið komi þá til umfjöllunar.

Bæjarbúinn Siggeir hefur sterkar skoðanir

Fyrir liggja athyglisverðar færslur Siggeirs á Facebook þar sem hann færir rök fyrir þeim sjónarmiðum sínum að skoðanir hans hafi ekki áhrif á störf sín fyrir bæinn.

„Vinna mín við heimasíðu Grindavíkurbæjar er öll unnin á 100% faglegan hátt. Síðan er algjörlega ópólítísk og þar einblínum við á jákvæðar fréttir og tökum ekki afstöðu með eða á móti þeim málum sem fjallað er um í bæjarstjórn. Ég aftur á móti, bæjarbúinn Siggeir F. Ævarsson, hef ákveðnar og stundum sterkar skoðanir á sumu sem bæjarstjórn gerir, eðlilega. Ég frábið mér allar fullyrðingar um að ég eigi ekki að skipta mér af grindvískri pólítík vegna stöðu minnar. Vinna mín og skoðanir mínar eru tveir aðskildir hlutir og væri óskandi að fólk gerði sér grein fyrir því. Ef fólk ætlar í alvöru að fara að heimta að ég haldi mínum skoðunum fyrir mig held ég að ég neyðist til að hringja í Ásmund Friðriksson og biðja hann um aðstoð við að verja málfrelsi mitt.“

Ekki eru alveg allir sammála þessum sjónarmiðum, eins og fram kemur á athugasemdaþræði þar sem þessi mál eru rædd af nokkru kappi.

Af barna- og mannorðsmorðingjumÞann 3. september síðastliðinn blandaði ég mér í umræður um flóttafólk frá Sýrlandi. Má...

Posted by Siggeir F. Ævarsson on 7. október 2015