Hæstiréttur staðfestir framlengt gæsluvarðhald yfir hollenskum manni

Hæstiréttur Íslands hefur staðfest gæsluvarðhaldsúrskurð yfir hollenskum karlmanni sem grunaður er um að smygla hátt í 80 kílóum af MDMA hingað til lands með Norrænu og í byrjun september.

Fyrr í vikunni hafði gæsluvarðhaldið yfir manninum verið framlengt til 2. desember. Verjandi mannsins kærði þann úrskurð til Hæstaréttar sem hefur nú staðsfest hann.

Kona mannsins sem einnig var handtekin grunuð um aðild að málinu verður áfram í farbanni til 18. nóvember. Hún var í gæsluvarðhaldi þar til um miðjan október en hefur verið í farbanni síðan.

Jónas Vilhelmsson, hjá lögreglunni á Austurlandi sem fer með rannsókn málsins, sagði í samtali við Vísi á mánudag að ómögulegt væri að segja til um hvenær rannsókn málsins lýkur en hún sé á áætlun. Málið teygir anga sína til Hollands.

Sagði Jónas að lögreglan biði eftir gögnum frá Hollandi til að geta lokið rannsókn.

Aðspurður hvort fíkniefnin sem parið er grunað um að hafa komið með hingað til lands hafi verið ætluð til sölu hér á landi eða hvort fara átti með efnin áfram úr landi, til dæmis til Bandaríkjanna, sagðist Jónas ekki geta tjáð sig um svo afmarkaðan hluta rannsóknarinnar.