Frásögn starfsmanna ólík Ólafs

„Viðbrögð Ólafs vekja mikil vonbrigði en til þessa hef ég átt gott samstarf við hann og ráðlagt honum og Þingvallanefnd heilt um málefni þjóðgarðsins. Þar byggi ég m.a. á áratugareynslu af rannsóknum í Þingvallavatni, sem enn standa yfir,“ segir Hilmar J. Malmquist, forstöðumaður Náttúruminjasafns Íslands, en Ólafur Örn Haraldsson þjóðgarðsvörður sagði í Fréttablaðinu í gær að Hilmar færi með rangt mál þegar hann staðhæfði að skólpvatn sytri út í umhverfið úr þróm í þjóðgarðinum og á vatnasviði Þingvallavatns.

„Fyrir aðeins rúmri viku fór ég á Þingvöll ásamt fræðimönnum sem þekkja vel til náttúru svæðisins gagngert til að spá í fráveitumál. Þar var rætt við tvo starfsmenn Ólafs Arnar um fráveitumál á Hakinu, við þjónustumiðstöðina á Leirum og fleiri stöðum. Þær upplýsingar sem starfsmennirnir veittu um ástand mála staðfesta mitt mál og stangast á við ávirðingar Ólafs Arnars,“ segir Hilmar.

Hilmar segir enn fremur að viðbúið sé að á álagstímum, þegar mikill fjöldi heimsækir þjóðgarðinn, sytri skólpvatn út í umhverfið, enda séu langflest kerfin á staðnum sett upp með það í huga, samkvæmt þeim gögnum sem hann hefur undir höndum um fyrirkomulag við rotþrær, syturlagnir og tæmingu þróa.

Hilmar ítrekar þá skoðun sína, sem Ólafur segir vera aulabrandara, að á meðan fráveitukerfi í þjóðgarðinum séu ekki afkastameiri en gögn bendi til sé eðlilegt að gestir hlífi þjóðgarðinum eftir bestu getu.

Nánar má lesa um afstöðu Hilmars í aðsendri grein hans á visir.is.