Klerkur kaldhæðinn um aðskilnað ríkis og kirkju

Séra Hildur Eir Bolladóttir, sóknarprestur í Akureyrarkirkju, kemur mörgum á óvart þegar hún lýsir því yfir, í upphafi nýlegrar Facebook-færslu sinnar, að hún sé hlynnt aðskilnaði ríkis og kirkju. Færslan hefst á þessum orðum:

„Satt best að segja er ég bara nokkuð hlynnt aðskilnaði ríkis og kirkju...“ En, það fylgir böggull skammrifi, því við tekur; „... það eru bara nokkur atriði í okkar samfélagi sem ég tel að þurfi að vera fyrir hendi áður en af fullum aðskilnaði verður.“

Og svo hefst upptalning Séra Hildar og þar nefnir hún samfélagsþjónustu til sögunnar, væntanlega þjónustu sem kirkjan rækir:

„Í fyrsta lagi þarf ríkið að greiða niður sálfræðiþjónustu þannig að allir geti farið til sálfræðings óháð búsetu og efnahag,

í öðru lagi þarf að koma á laggirnar sólarhrings sálgæsluþjónustu þannig að hægt sé að hringja út fagfólk þegar andlát verður, eftirlifendum að kostnaðarlausu,

í þriðja lagi þarf ríkið að sjá til þess að hjón eigi möguleika á stuðningi og áheyrn við brotsjó og skilnað,

í fjórða lagi þarf að eyða öllum biðlistum barna og ungmenna sem þurfa á geðlækningum að halda.“

Þegar þarna er komið sögu ætti lesanda að vera ljóst að þegar Séra Hildur Eir talar um aðskilnað ríkis og kirkju, en fyrir því er lítill stuðningur í ranni presta, þá er það í fremur kaldhæðinni meiningu. Þó hún fari vel með það. Og prestur lokar svo færslu sinni með þessum orðum: „Ég er sannfærð um að þetta er hægt ef vilji er fyrir hendi, þá er líka passlegt að aðskilja ríki og kirkju.“

Satt best að segja er ég bara nokkuð hlynnt aðskilnaði ríkis og kirkju, það eru bara nokkur atriði í okkar samfélagi sem...

Posted by Hildur Eir Bolladóttir on 26. október 2015