Reglur um tengsl koma í veg fyrir nýrnagjöf til fárveikrar konu

Sautján manns hafa sett sig í samband við systur tæplega fertugrar konu með alvarlegan nýrnasjúkdóm, eftir að hún auglýsti eftir nýra í gegnum Facebook. Málið stoppar á reglum Landspítala um að einhverskonar tengsl þurfi að vera til staðar svo hægt sé að gefa líffæri. 

Bryndís Jónsdóttir hefur barist við sjálfofnæsmissjúkdóm frá  2001. Nú eru nýru hennar eru nánast hætt að starfa og ljóst að hún þarf á nýju að halda, en ekki hefur fundist nýra sem passar hjá fjölskyldu og vinum. Sigríður María Jónsdóttir, systir Bryndísar, og Ingibjörg Gunnarsdóttir, vinkona hennar, ákváðu því að auglýsa eftir nýra á Facebook og hafa viðbrögðin ekki látið á sér standa. Sautján manns hafa haft samband við þær og lýst yfir áhuga á að gefa Bryndísi nýra.

En málið er flóknara en svo. Á Landspítalanum gilda reglur um að einhverskonar tengsl þurfi að vera á milli þess sem gefur nýra og þess sem þiggur það. Er það meðal annars gert af siðferðisástæðum og til að koma í veg fyrir viðskipti með líffæri.

„Þetta fólk hefur allt verið tilbúið að stíga þessi skref og þeim finnst þetta vera ósanngjarnt, að mega ekki gefa þó að þau þekki hana ekki. Þetta er allt fólk í sama blóðflokki og hún,“ segir Sigríður.

Þær vilja sjá reglunum breytt.

„Ég held að meirihluti fólks átti sig ekki á stöðunni, hvernig þetta er. Fólk er rosalega hissa á þessu og þetta kemur fólki á óvart, að kærleikurinn og samkenndin skuli ekki vera númer eitt, tvö og þrjú. Það er ekki nema klukkutími síðan við fengum símtal frá manni sem hafði mikinn áhuga á að gefa en honum var vísað frá þar sem það voru ekki nógu mikil tengsl,“ segir Ingibjörg.

„Í rauninni finnst mér leitt að við skulum búa í samfélagi þar sem regluverk skuli koma í veg fyrir að maður geti hjálpað náunga sínum. Það er eitthvað mikið að. Þessu þarf að breyta,“ bætir hún við.