SVÞ fagna endurskoðun tollakerfisins

 „Við fögnum því að tollakerfið verði tekið til heildarendurskoðunar. Það er löngu orðið tímabært. Þetta er mikið hagsmunamál fyrir verslunina og ekki síður fyrir neytendur.“ Þetta segir Margrét Sanders, formaður Samtaka verslunar og þjónustu, SVÞ. Fréttablaðið hafði það eftir Bjarna Benediktssyni fjármálaráðherra í gær að skoða þyrfti möguleika á heildarendurskoðun tollakerfisins. Hann gat þess í því samhengi að fataverslun væri að tapast úr landinu. Íslendingar væru í stórauknum stíl að sækja sér hversdagsföt til útlanda.

SVÞ benda á að lagður sé 15 prósenta tollur á fatnað og skó auk þess sem stór hluti þessara vara beri annan 15 prósenta toll sem Evrópusambandið leggi á við innflutning til aðildarríkja þess. Auk þess sé lagður 24 prósenta virðisaukaskattur á föt og skó. Afnám tolla og lækkun virðisaukaskatts á þessar vörur sé ekki síst hagsmunamál fyrir þá sem lægstar tekjurnar hafa enda sé sá hópur ólíklegastur til að flytja farma af fatnaði í ferðatöskum til landsins.

„Niðurstöður könnunar sem við gerðum fyrir nokkrum árum sýndu að 40 prósent barnafatnaðar voru keypt í útlöndum og 35 prósent af öðrum fatnaði. Fleiri kannanir hafa sýnt þetta og að kaup í útlöndum hafi aukist frekar en hitt. Tekjulægsti hópurinn var hins vegar ekki að kaupa fatnað í útlöndum,“ segir Margrét.