Ætlaði að „pakka þeim saman“

Héraðsdómur Reykjavíkur hefur dæmt karlmann í fjögurra mánaða fangelsi fyrir brot gegn valdstjórninni. Honum er gert að hafa veist að lögreglumönnum fyrir utan World Class í Kringlunni þann 31. desember árið 2012. Hann ýtti við þeim og sló ítrekað til þeirra hnefahöggum sem geiguðu. Þá á hann að hafa sagst ætla að pakka þeim saman.

Lögreglu hafði borist beiðni um aðstoð vegna manns sem sæti í kyrrstæðri bifreið, en samkvæmt tilkynningunni virtist hann vera veikur eða í annarlegu ástandi.

Lögreglumenn segja að hann hafi verið sofandi þegar þeir komu á vettvang og að þeir hefðu reynt að vekja hann. Þá segir í skýrslu lögreglunnar að hann hafi greinilega verið í annarlegu ástandi. Þegar þeim tókst að vekja hann fengu þeir hann til að stíga úr bílnum. Hann fór þó aftur inn í bílinn og reyndi að loka dyrunum.

Þegar lögreglumennirnir reyndu að fá hann út aftur brást hann illa við og „verið með ógnandi tilburði, rifið sig úr úlpu og ætt að þeim,“ eins og segir í dómnum. Lögreglumennirnir drógu upp kylfur og fékk hann minnst tvö högg á meðan á þessu stóð.

Þá mun maðurinn hafa hlaupið inn í líkamsræktarstöðina, þar sem hann var yfirbugaður.

Maðurinn neitaði hins vegar sök. Hann sagði að hann hefði vaknað við bank lögreglumannanna og opnað dyrnar. Hann segist ekki hafa viljað stíga út í fyrstu en hann hafi gert það á endanum. Þá segir hann að lögreglumennirnir hafi slegið sig með kylfum og þá hafi hann hlaupið inn í líkamsræktarstöðina, þar sem hann var yfirbugaður með varnarúða.

Hann sagðist ekki hafa verið í annarlegu ástandi, né hafi hann verið ógnandi við lögreglumennina.

Héraðsdómur sagði lýsingar lögreglumannanna á atvikinu hafa verið samhljóma og bendir á að í tilkynningunni til lögreglunnar hafi maðurinn verið sagður veikur eða í annarlegu ástandi. Dómnum þótti sannað að hann hefði gerst sekur um þá háttsemi sem honum var gefið að sök.

Dóm Héraðsdóms Reykjavíkur í heild sinni má sjá hér.