Vitni færð í opið úrræði eftir breyttan framburð

„Það virðist sem framburður hafi gengið kaupum og sölum inni á Litla-Hrauni,“ segir Hólmgeir Elías Flosason, verjandi Annþórs Kristjáns Karlssonar í sakamáli gegn honum og Berki Birgissyni vegna andláts samfanga þeirra á Litla-Hrauni í maí 2012. Aðalmeðferð málsins fer fram í október næstkomandi, rúmum þremur árum eftir að þeir voru ákærðir. „Ég hef fengið það staðfest að einn fangi hafi verið fluttur í opnara fangelsi eftir að hafa breytt framburði sínum. Ég veit líka að hann var með agabrot og því hefði ekki átt að koma til álita að flytja hann,“ segir Hólmgeir.

Í greinargerð ákærða, Annþórs, sem lögð var fram við fyrirtöku málsins þann 7. september síðastliðinn kemur fram að eftir skýrslutökur hjá lögreglu hafi sú umræða vaknað að lögreglan á Selfossi hefði reynt að hafa áhrif á framburð vitna þar sem föngum hefði verið boðin ívilnun fyrir framburð sem lofað væri að yrði undir vitnaleynd. Ívilnanirnar hafi verið í formi loforðs um opnari úrræði í afplánun þeirra fanga sem gáfu framburð. Þá segir að sérstakt þyki að framburður vitnanna hafi tekið breytingum ákæruvaldinu í hag og að það liggi fyrir að hluti þeirra var skömmu síðar fluttur í mildara fangelsi, þrátt fyrir að slíkt hefði ekki átt að koma til skoðunar, svo sem vegna agabrota.

„Um hlýtur að vera að ræða óvenju sérstæða tilviljun,“ segir Hólmgeir.

„Það kemur stundum fyrir að fangar beri vitni gegn öðrum fanga í sama fangelsi og þá er reynt að aðskilja þá á meðan af öryggisástæðum ef lögmaður fangans eða fanginn sjálfur óskar eftir því,“ segir Margrét Frímannsdóttir, forstöðumaður fangelsisins á Litla-Hrauni. Fangelsismálastofnun taki svo ákvörðun um tilfærslu fanga.

Hún staðfestir að vitni í málinu hafi verið fært á fangelsið að Sogni. Það hafi verið gert á þeirri forsendu að tryggja öryggi hans. „Svo fáum við eðlilega aldrei að vita hvað þeir segja í yfirheyrslu hjá lögreglu.“

Margrét segir að það sé gert í algjörum undantekningartilvikum að fangar sem bera vitni séu færðir í opið úrræði án þess að eiga rétt á því. „Það er þá gert við alveg sérstakar aðstæður, til dæmis vegna öryggis fangans eða plássleysis í öðrum fangelsum,“ segir Margrét og bætir við að aðskilnaður sé oft illmögulegur vegna plássleysis en aðstæður eigi eftir að breytast þegar Fangelsið að Hólmsheiði verði opnað.