Frelsissvipting í Mosfellsbæ: Hæstiréttur staðfestir sex ára fangelsi

Hæstiréttur hefur staðfest dóm Héraðsdóms Reykjavíkur yfir karlmanni sem í maí var dæmdur í sex ára fangelsi fyrir nauðgun, líkamsárás og frelsissviptingu á hendur barnsmóður sinni og barni á jólanótt árið 2013. Maðurinn hefur setið óslitið í gæsluvarðhaldi síðan þá og dregst það frá refsingunni. Þá er honum gert að greiða konunni 3,5 milljónir króna og barninu 800 þúsund, ásamt því að greiða allan áfrýjunarkostnað.

Maðurinn, sem er íslenskur, hélt konunni og tveggja ára dóttur þeirra nauðugum í íbúð konunnar í Mosfellsbæ í fimm klukkustundir að morgni jóladag, þar til henni tókst að flýja úr íbúðinni og leita skjóls hjá nágranna. Sérsveit lögreglu var kölluð út til að yfirbuga manninn en hann hafði hótað konunni og barninu, sem enn var í íbúðinni, lífláti.

Játaði að hafa ráðist á konuna

Hann játaði að hafa ráðist á konuna, slegið hana víðsvegar um líkamann og rifið í hár hennar, en neitaði hins vegar að hafa slegið hana hnefahöggum og kannaðist ekki við að hafa sparkað í hana. Þá sagðist hann hafa haft samræði við konuna en það hafi verið með hennar samþykki.

Sjá einnig: Frelsissvipting á jólanótt

Í dómi héraðsdóms segir að nauðgunarbrotið hafi verið framið á „sérstaklega meiðandi hátt“. Konan kvað manninn hafa sett hníf að hálsi hennar, girt niður um hana, rifið nærbuxurnar utan af henni og nauðgað henni aftan frá. Þá kvað hún manninn hafa sagst ætla að drepa hana og skera af henni brjóstið. Hún hefði í kjölfarið hlaupið út úr íbúðinni, að næstu blokk, til að fá aðstoð.

Brást illa við nýjum kærasta

Konan, sem er rétt rúmlega tvítug, hafði boðið manninum að verja jólunum með þeim mæðgum þar sem hann átti fáa að hér á landi, en hann var búsettur í Noregi. Þau hættu saman tæpu ári áður eftir þriggja ára samband. Hann var kominn í samband með annarri konu sem henti honum út á aðfangadagskvöld og hringdi þá í konuna sem bauð honum í heimsókn sem fyrr segir. Maðurinn byrjaði strax að tala illa um nýjan kærasta barnsmóður sinnar. Þegar konan tók ekki undir það með honum réðst maðurinn á hana. Honum er gefið að sök að hafa meðal annars rispað hana með hnífi og tekið af henni farsímann svo hún gæti ekki hringt eftir aðstoð.