Verð á áli heldur áfram að lækka

Heimsmarkaðsverð á áli lækkaði enn í júlí og hefur nú lækkað um tæp 18 prósent frá nóvember 2014. Töluverðar birgðir af áli sem og aukin framleiðsla Kínverja skýrir lækkunina, sem hefur verið viðvarandi síðustu árin.

Stærstu viðskiptavinir Landsvirkjunar eru álver og er hluti tekna fyrirtækisins bundinn álverði, en dregið hefur úr umfangi þess hluta í heildartekjum Landsvirkjunar.

„Varðandi reksturinn þá eru þrír stærstu viðskiptavinir okkar álfyrirtækin, við fylgjumst því mjög grannt með áliðnaðinum og það sem einkennir álverð er að það er mjög sveiflukennt. Við höfum áður séð sveiflur og það hefur komið til baka og við vonum bara að það gerist aftur,“ segir Hörður Arnarson, forstjóri Landsvirkjunar.

Hörður segir að álverð hafi farið lengra niður en flestir áttu von á. Það hafi áhrif á afkomu Landsvirkjunar.

„Það sem hefur áhrif á okkur er að hluti af okkar orkuframleiðslu er tengdur við þróun álverðs og það hefur áhrif á um 30 prósent af tekjum okkar. Við höfum dregið markvisst úr því og árið 2009 var þetta 51 prósent, þannig að áhrifin eru minni. En meðan verðið er svona tengt hefur þetta alltaf áhrif á framtíðartekjur okkar. Það mun sjást í uppgjörunum okkar.“

Nokkur álver eru á teikniborðinu, en Hörður segir að Landsvirkjun tjái sig ekki um verkefni í vinnslu vegna viðskiptalegra sjónarmiða.

„Almennt má segja að svona lágt álverð hefur neikvæð áhrif á þau álverkefni sem menn eru að skoða á Íslandi og annars staðar. Það er alveg ljóst að það eru allar líkur á að það dragi úr vilja manna til að auka afköstin.

Norðurál vinnur að stækkun álvers á Grundartanga og hefur unnið lengi að byggingu álvers í Helguvík. Ágúst F. Hafberg er framkvæmdastjóri viðskiptaþróunar og samskipta hjá Norðuráli.

„Við vinnum að stækkun á Grundartanga og það heldur bara áfram. Varðandi Helguvík þá erum við bara að bíða eftir orkumálum hjá HS Orku, það er svo sem ekkert meira um það að segja.“



Lítið á seyði næstu árin Sigurður Jóhannesson, hagfræðingur við Háskóla Íslands, segir lækkandi álverð hafa áhrif á áhuga á byggingu álvera eða virkjana fyrir álver. Telur hann skynsamlegt að fara út í slíkar framkvæmdir út frá hagfræðilegu sjónarmiði? „Það er eitt hvað menn gera og annað hvað er skynsamlegt. Nei, ég held að það verði ekki af slíkum framkvæmdum. Ég reikna með að bæði sé áhugaleysi hjá þeim sem stjórna virkjanaframkvæmdum hér sem og álframleiðendum á því að gera eitthvað næstu árin. Ég sé ekki neinar líkur á því að það gerist neitt.“