Skemmdir á bíl dómara eftir leik í fjórðu deildinni

Knattspyrnudómari kom að skemmdum á rúðu á bíl sínum að lokinni viðureign KH og Vantalilja í B-riðli 4. deildar karla í knattspyrnu sem fram fór á gervigrasvelli Vals á Hlíðarenda í gærkvöldi.

KH vann leikinn 4-1 og eins og gengur voru sumir leikmenn Vatnalilja ósáttir með frammistöðu dómarans. Einn leikmanna liðsins kallaði dómarann fávita á Facebook í gærkvöldi og sagði „alveg magnað hvaða fávitar fá að dæma þessa leiki!!!“

Dómarinn, Bryngeir Valdimarsson, fór með bílinn til lögreglu sem tók af honum skýrslu vegna málsins. Annars vildi Bryngeir lítið tjá sig um málið við Vísi og vísaði á dómarastjóra KSÍ, Magnús Má Jónsson. Magnús segir í samtali við Vísi að málið sé á byrjunarreit.

Engar ásakanir

„Við erum að kanna málið, hvort þetta tengist leiknum eða ekki. Það eru engar ásakanir eða neitt í farvatninu,“ segir Magnús. Rúðan sé ekki fullkomlega brotin heldur eru komnir brestir í hana. Það geti vel átt sínar eðlilegu skýringar.

Undir það tekur Fannar Eðvaldsson, leikmaður Vatnalilja, sem telur ólíklegt að einhver af sínum liðsfélögum hafi verið að verki.

Framkvæmdir standa yfir á Hlíðarenda þar sem verið er að leggja gervigras á aðalvöll þeirra Valsmanna. Vörubílar aka því reglulega til og frá svæðinu og gæti því verið að steinn hafi smollið í rúðunni. Honum þyki það líklegra en að einhver leikmanna hafi tekið reiði sína út á bíl dómarans. Hann hafi ekki merkt reiði á meðal leikmanna í klefanum eftir leik og oft spilað meiri „hitaleiki“ en þennan.

Þjálfari liðsins, Hörður Ingþór Harðarson, tekur undir með Fannari. Þá bætir hann við að hann telji einnig ólíklegt að nokkur leikmaður liðsins hafi vitað á hvaða bíl dómarinn væri. Menn væru í fótbolta til að skemmta sér og færu ekki skemma bíl dómarans.