„Fólk má alveg vita að ég er ekki hræðileg, leiðinleg snobbhæna“

Gróa á Leiti hefur elt Manúelu Ósk Harðardóttur allt síðan hún var krýnd Ungfrú Ísland árið 2002. Þetta kemur fram í opinskáu viðtali við hana í nýjasta tölublaði tímaritsins Nýtt líf.

Manuela var 18 ára gömul þegar hún vann fegurðarsamkeppnina og segist í viðtalinu hafa verið ómeðvituð um skuggahliðar þess að vera í sviðsljósinu.

„Ég tók gelgjuna út fyrir framan alþjóð. Ég lagði mig alltaf fram við að koma vel fyrir og vera góð fyrirmynd en stundum vissi ég bara ekki betur. [...] Ég fékk látlausar beiðnir um viðtöl og mig vantaði einfaldlega nokkur ár í reynslubankann hvað varðar fjölmiðla. Ég sé eftir ýmsu, að sjálfsögðu, en leiðinlegast þykir mér hvað fólk nærist á neikvæðni því það er jú almenningur sem kaupir blöðin.“

 

Hún segist hafa lært að sleppa tökum á slúðrinu og lætur sér nú fátt um finnast. Aðspurð hvaða sögur um hana séu henni minnisstæðastar segir Manuela:

„Ég vil nú ekki setja mikla orku í þessar sögur og orð eru vissulega álög en fólk má alveg vita að ég er ekki hræðileg, leiðinleg snobbhæna sem eyðir klukkustundum fyrir framan spegil á morgnana og djammar frá sér allt vit. Ég er ekki búin að fjarlægja úr mér rifbein og ég hef aldrei haldið framhjá. Sumum finnst ég meira að segja ansi fyndin og skemmtileg og ég heyri mjög oft þessa setningu frá fólki sem ég kynnist: „Vá, þú ert allt öðruvísi en ég hélt.““