Mónakó og Monte Carlo fá ekkert frá Reykjavík

Aðalsteinn Kjartansson skrifar 19. mars 2015 23:26

Eigendur Monte Carlo vildu bætur frá Reykjavík vegna neikvæðrar umsagnar. Vísir/Daníel

Eigendur Monte Carlo og Mónakó fá ekki skaðabætur frá Reykjavíkurborg vegna umsagnar sem borgin skilaði til lögreglunnar vegna endurnýjunar á rekstrarleyfum staðanna tveggja. Hæstiréttur kvað upp dóm í málinu í dag .

Margeir Margeirsson, vert á börunum tveimur, stefndi borginni og fór fram á skaðabætur upp á tæpar fimmtán milljónir króna vegna tjóns sem hann taldi sig hafa orðið fyrir á árunum 2007 til 2012 þegar erfiðlega gekk að endurnýja rekstrarleyfi staðanna.

Borgarráð Reykjavíkur gaf út neikvæðar umsagnir vegna rekstrarleyfanna og lagðist þannig gegn því að þau yrðu endurnýjuð. Lögreglustjórinn á höfuðborgarsvæðinu tók mið af því í ákvörðun sinni og hafnaði endurnýjun.

Lögreglustjórinn á höfuðborgarsvæðinu var tvívegis gerður afturreka með ákvarðanir sem vörðuðu Mónakó og Monte Carlo. Í fyrra skiptið, árið 2008, var ákveðið að takmarka opnunartíma þeirra, og árið 2012 var ekki fallist á endurnýjun rekstrarleyfisins.

Málin rötuðu á borð innanríkisráðuneytisins þar sem lögreglunni var gert að taka málin upp að nýju. Meðal annars var það niðurstaða ráðuneytisins að ekki hafði verið gætt að andmælarétti Margeirs í umsagnarferlinu auk þess sem borgin hafði í umsögnum sínum farið út fyrir valdsvið sitt.

Þrátt fyrir það fellst dómurinn ekki á að Reykjavíkurborg hafi bakað sér skaðabótaskyldu en samkvæmt lögum á borgin að gefa umsögn.

Tengdar fréttir

Eigandi Monte Carlo ætlar að stefna borginni og lögreglunni

Margeir Margeirsson, eigandi veitingastaðanna Mónako og Monte Carlo á Laugavegi, ætlar að höfða skaðabótamál gegn lögreglunni á höfuðborgarsvæðinu og Reykjavík vegna þeirrar ákvörðunar að synja stöðunum um veitingaleyfi. Ákvörðunin var tekin á grundvelli neikvæðrar umsagnar borgarráðs, en innanríkisráðuneytið hefur úrskurðað að með umsögninni hafi borgarráð farið út fyrir umsagnarsvið sitt og með því brotið gegn stjórnsýslulögum. Margeir segist í fréttastofu hafa varið um 10 milljónum króna í lögfræðikostnað vegna málsins.

18. júní 2012 17:00