Dæturnar halda kyndlinum á lofti: Margeir á Mónakó gefst ekki upp

Munnlegur málflutningur í skaðabótamáli rekstrarfélaga öldurhúsanna Mónakó og Monte Carlo gegn Reykjavíkurborg fór fram í Hæstarétti í dag. Dómur féll í málinu í héraði í júní í fyrra og var borgin þá sýknuð af kröfum félaganna en málinu var áfrýjað.

Margeir Margeirsson, vert á börunum tveimur, stefndi Reykjavíkurborg og fór fram á skaðabætur upp á tæpar 15 milljónir króna vegna tjóns sem hann telur sig hafa orðið fyrir á árunum 2007 til 2012 þegar erfiðlega gekk að endurnýja rekstrarleyfi staðanna.

Lögreglustjórinn á höfuðborgarsvæðinu var tvívegis gerður afturreka með ákvarðanir sem vörðuðu Mónakó og Monte Carlo. Í fyrra skiptið, árið 2008, var ákveðið að takmarka opnunartíma þeirra, og árið 2012 var ekki fallist á endurnýjun rekstrarleyfisins.

Endurteknar kvartanir vegna ónæðis

Ákvarðanirnar byggðu á umsögnum Reykjavíkurborgar en í þeim var vísað til kvartana vegna ónæðis frá stöðunum og fjölda mála sem tengdust þeim og voru á skrá hjá lögreglu.

Innanríkisráðuneytið felldi báðar þessar ákvarðanir úr gildi og komst að þeir niðurstöðu að þær hefðu ekki verið í samræmi við lög. Meðal annars hafði ekki verið gætt að andmælarétti Margeirs í umsagnarferlinu auk þess sem borgin hafði í umsögnum sínum farið út fyrir valdsvið sitt.

Í kjölfarið fékkst rekstarleyfi fyrir báðum stöðunum og er Mónakó enn í fullum rekstri en Monte Carlo var lokað fyrir ári í kjölfar þess að húsnæðið var selt.

Dæturnar halda kyndlinum á lofti

„Ég er nú kominn á eftirlaun og er bara starfsmaður þarna en dætur mínar sjá um reksturinn,“ segir Margeir Margeirsson í samtali við Vísi.

Hann hefur verið í bransanum lengi en hann opnaði barinn Keisarann við Hlemm árið 1989 og svo Mónakó fjórum árum síðar. Monte Carlo var opnaður árið 2005 og stuttu síðar byrjuðu vandræðin.

„Það átti bara að ganga frá Mónakó og Monte Carlo en það tókst ekki. Við fengum í kjölfarið á þessu öllu fullt leyfi og höfum haldið okkar striki,“ segir Margeir.

Hann segir að sá fjöldi mála í skrá lögreglu sem á að tengjast Mónakó eða Monte Carlo sé úr öllum tengslum við raunveruleikann.

„Í þessari skrá sem á að hafa legið til grundvallar því að við fengum ekki rekstrarleyfi á sínum tíma voru til dæmis þjófnaðir í verslunum í nágrenni staðanna. Einhverra hluta vegna voru þeir skráðir sem brot á Mónakó eða Monte Carlo þó að þessir þjófnaðir hafi ekkert komið okkur eða viðskiptavinum okkar við.“

Mun ekki gefast upp

Nú sér fyrir endann á 8 ára langri baráttu Margeirs þegar Hæstiréttur mun kveða upp sinn dóm.

„Það kemur bara í ljós hvernig þetta mál endanlega fer en það virðist nú vera þannig að stjórnvaldið vinnur oftast. Ég gefst hins vegar ekkert upp. Fólk hefur komið til mín og sagt að ef einhver annar hefði lent í þessum slag þá hefði stöðunum verið lokað fyrir löngu en það fór ekki þannig hjá mér.“