Bjarni Bernharður sakar Forlagið um aumingjaskap

Rithöfundurinn Bjarni Bernharður Bjarnason, geðsjúkur morðingi (eins og hann kallar sig í mikilli ádrepu), fordæmir Forlagið og framkvæmdastjóra þess; Egil Örn Jóhannsson en bókaútgáfan hafnaði handriti sem hann sendi inn, og sakar um aumingjaskap.

Handrit Bjarna tekur á málum sem hafa verið í deiglunni fjölmiðaumræðunni undafarna ártugi, eins og geðsjúkdómum, vímuefnaneyslu, einelti og stöðu barns sem skólakerfið hafnar og svo framvegis og svo sjónarhorn Bjarna á þessi mál. Bjarni segir það einstakt vegna þess að það byggir á eigin reynslu. „Í handritinu, sem er einstakt í sinni röð, meðal annars vegna þess að það er mjög sjaldgæft í veröldinni að maður hafi lifað það fara í gegnum níu geðklofaköst og sé til frásagnar á eftir,“ segir Bjarni í harðorðri yfirlýsingu á Facebook-síðu sinni.

Klíkuskapur og undirlægjuháttur

Bjarni Bernharður hann velkist hvergi í vafa um hvað ræður því að Forlagið vill ekki gefa út bók hans. Það er maðurinn ekki bókin.

„En, svei, ég hef skömm á útgefendum sem þora ekki fyrir sitt litla líf að taka áhættu, yfirleitt skömm á íslenskum bókmenntaheimi sem stjórnast af klíkuskap og undirlægjuhætti. Ég er þó ekki í neinu stríði við útgefendur eða bókmenntafræðinga. Þó vil ég segja þér að ég hef sterkan aðgang af fjölmiðlum og mun hiklaust greina frá því hversu lítilsigld ritstjórnastefna Forlagsins er. Að það hafi ekki þorað að gefa út handrit eftir BBB (geðsjúkan morðingja), að það hafi ekki þorað að standa með BBB, að það hafi ekki þorað að gefa út handrit eftir BBB vegna þess það hafði að geyma OF MIKINN SANNLEIK. Ég hef ekki sagt mitt síðasta í íslenskum rithöfundarheimi og mun reynast mörgum erfiður ljár í þúfu áður en yfir líkur. Hvers vegna þá? Vegna þess að ég MAÐUR SANNLEIKANS og það eitt kallar á harða gagnrýni yfir menn og málefni á Íslandi.“

Fjölda handrita hafnað

Egill Örn Jóhannsson, framkvæmdastjóri Forlagsins, vill ekki tjá sig mikið um þetta mál. En segir þó: „Hingað koma að jafnaði meira en handrit á dag, hvern dag ársins og það gefur augaleið að Forlagið getur ekki tekið allt til útgáfu sem hingað berst.“

En Bjarni vill meina að þetta snúist um manninn, ekki bókina?

„Ég ætla ekki að skattyrðast við Bjarna Bernharð um hvers vegna við höfnuðum handritinu.“

Innlegg frá Bjarni Bernhardur Bjarnason.