Samkomulag þokast nær segir Cameron

„Okkur hefur miðað vel áfram,“ sagði David Cameron, forsætisráðherra Bretlands, um fundi sína með leiðtogum annarra Evrópuríkja um breytingar á Evrópusambandinu.

„Við erum komin skrefi nær samkomulagi um þær mikilvægu og víðtæku umbætur sem ég hef lagt til,“ sagði hann eftir að hafa kynnt hinum leiðtogunum hugmyndir sínar um það í hverju breytingarnar eigi að vera fólgnar.

Cameron stefnir að því að efna til þjóðaratkvæðagreiðslu strax á næsta ári um nýjan samning Bretlands við Evrópusambandið.

„Þá verður það ákvörðun bresku þjóðarinnar hvort við verðum áfram inni eða förum,“ sagði Cam­eron við fjölmiðla í gær.

Leiðtogar hinna ríkjanna tóku vel í málflutning Camerons, en gerðu honum samt ljóst að ekki komi til greina að semja um nein frávik frá meginreglum Evrópusambandsins.

„Við sögðum það mjög skýrt að við erum tilbúin í málamiðlanir en alltaf á þeim grunni að við tryggjum meginreglur Evrópusambandsins, sem meðal annars snúast um bann við mismunun og ferðafrelsi,“ sagði Angela Merkel, kanslari Þýskalands.

„Það má aðlaga ýmislegt,“ sagði François Hollande, forseti Frakklands, „en meginreglur Evrópusambandsins, lög Evrópusambandsins og samninga Evrópusambandsins verður að virða.”

Þetta gæti torveldað Cameron mjög að ná fram þeim breytingum sem flestir helstu andstæðingar Evrópusambandsins í Bretlandi, bæði innan flokks hans og utan, segja mikilvægastar.

Cameron hefur sagt að hann vilji styrkja stöðu Bretlands og annarra Evrópusambandsríkja gagnvart miðstjórnarvaldinu í Brussel, meðal annars með því að efla völd þjóðþinga aðildarríkjanna.

Hann vill einnig tryggja að þau aðildarríki sem standa utan við evru­svæðið verði ekki utangarðs þegar teknar eru ákvarðanir í mikilvægum efnahagsmálum.

Þá hefur Cameron undanfarið lagt áherslu á að takmarka réttindi innflytjenda til bóta í Bretlandi.

Samkvæmt drögum að málamiðlun, sem nú þegar er búið að semja á skrifstofum framkvæmdastjórnar Evrópusambandsins, virðist þetta markmið líklegt til að nást en þó aðeins að hluta, að því er breska dagblaðið The Guardian greinir frá.

Framkvæmdastjórnin virðist til í að leyfa breskum stjórnvöldum að neita innflytjendum frá öðrum Evrópusambandsríkjum um bætur fyrsta hálfa árið, eftir að þeir flytja til Bretlands. Þarna munar hins vegar miklu frá því sem Cameron hefur sagt, að neita þurfi innflytjendum um bætur fyrstu fjögur árin.