Í mínum huga er ég alltaf sá besti

Cristiano Ronaldo segist líta á sig sem besta knattspyrnumann heims og einn þann besta frá upphafi.

Hann er í áhugaverðu viðtali við BBC í dag þar sem ýmislegt kemur fram.

„Ég þarf ekkert að segja að ég sé í sögubókunum eða goðsögn. Tölurnar mínar segja allt sem segja þar," segir Ronaldo en hann gekk til liðsins við Real Madrid frá Man. Utd árið 2009. Hann er orðinn þrítugur í dag.

Ferill hans er vissulega stórkostlegur en Ronaldo hefur skorað 504 mörk í 760 leikjum.

„Að bæta mig enn frekar er erfitt. Ég vil þó halda þeim gæðum sem ég hef náð í dag. Það erfiðasta fyrir fótboltamann er að ná stöðugleika þegar hann hefur toppað," sagði Ronaldo sem hefur skorað 82 mörk í Meistaradeildinni og er sá markahæsti þar frá upphafi.

„Í mínum huga er ég alltaf sá besti. Mér er alveg sama hvað öðrum finnst. Ég lít ekki á mig sem þann besta í ár heldur alltaf."

Ber sterkar taugar til Man. Utd

Það er endalaust rifist um hver sé betri. Hann eða Messi. Eðlilega var Ronaldo spurður út í málið.

„Þetta eru skoðanir fólks. Kannski finnst þér Messi vera betri en ég tel mig vera betri. Þetta er auðvelt mál. Þarna er bara skoðanamunur."

Árangur Ronaldo hjá Real Madrid hefur verið lyginni líkastur. Þar er hann búinn að skora 326 mörk í 314 leikjum. Hann er þegar orðinn sá markahæsti frá upphafi hjá félaginu.

Hann ber enn sterkar taugar til Man. Utd og finnst leiðinlegt að sjá stöðuna á liðinu í dag.

„Auðvitað er erfitt fyrir mig að fylgjast með liðinu ganga illa því ég elska félagið. Ég vil sjá Man. Utd á meðal bestu liðanna. Liðið er betra í ár en á enn nokkuð í land til að ná sömu gæðum og fyrir sex til sjö árum síðan," sagði Ronaldo en hvaða líkur eru á því að hann snúi aftur til félagsins?

„Ég hef margoft sagt að maður veit aldrei hvað framtíðin ber í skauti sér. Í dag er ég mjög hamingjusamur hjá Madrid. Ég mun alltaf svara svona því maður veit ekki hvernig framtíðin verður."