Vá hvað Gylfi var nálægt því að skora í gær | Myndband

Íslenski landsliðsmaðurinn Gylfi Þór Sigurðsson byrjaði á bekknum hjá Swansea á móti Stoke í ensku úrvalsdeildinni í gær en hann var nálægt því að bjarga stigi eftir að hann kom inná.

Gylfi hafði fyrir leikinn byrjað alla átta deildarleiki Swansea City á tímabilinu en Garry Monk, knattspyrnustjóri Swansea, ákvað að byrja með hann á bekknum í gær.

Gylfi var bara með eitt mark og eina stoðsendingu í fyrstu átta leikjunum sem er ekki mikil uppskera miðað við í fyrra þegar hann skoraði 7 mörk og gaf 10 stoðsendingar á öllu tímabilinu.

Eina mark Gylfa í vetur kom úr vítaspyrnu í 3-1 tapi á móti Southampton á St Mary's Stadium 26. september síðastliðinn.

Gylfi hefur því ekki enn skorað í opnum leik á leiktíðinni en hann komst svo sannarlega afar nálægt því í gærkvöldi.

Gylfi tók þá "Gylfa-snúning" fyrir framan vítateig Stoke og náði frábæru skoti sem Jack Butland, markvörður Stoke, var aldrei að fara að verja.

Butland og félagar hans í Stoke höfðu hinsvegar heppnina með sér því þrumuskot Gylfa fór rétt framhjá samskeytunum.

Gylfi og félagar í Swansea urðu því að sætta sig við þriðja tapið í síðustu fimm leikjum og að vera nú búnir að spila fimm deildarleiki í röð án þess að fagna sigri í ensku úrvalsdeildinni.

Hér fyrir ofan má sjá þetta frábæra skot Gylfa og það er ekki frá því að því fylgi svekkelsi í hvert einasta skipti að sjá skotið hans svífa rétt framhjá marki Stoke.