Sonur Illuga vaknaði við þjóf inni í svefnherberginu

Illugi Jökulsson lenti í því óþægilega atviki að innbrotsþjófur braust inn á heimili hans í nótt. Atvikið var sérstaklega óþægilegt fyrir son rithöfundarins þar sem hann vaknaði upp við að maðurinn sat inni hjá honum og rausaði. Frá þessu greinir Illugi á Facebook síðu sinni.

Hann segir í samtali við Vísi málið hafa farið betur en á horfðist. „Enginn var í hættu staddur sem er nú fyrir mestu en auðvitað var það óþægilegt fyrir son minn að vakna upp við það að einhver sé að þvælast inni á heimilinu,“ segir Illugi. Hann segir manninn hafa verið drukkinn en af heimilinu hurfu tölva og sími.

Illugi hringdi í símann sinn eftir að hann varð var við að tölvuna og símann vantaði og svaraði innbrotsþjófurinn.

„Ég hringdi bara í símann og hann svaraði fljótlega,“ útskýrir Illugi. Þeir mæltu sér mót rétt fyrir sex og skilaði maðurinn mununum. „Hann sagði að vinur sinn hefði verið með sér og að hann hefði tekið þetta en hann hefði síðan náð munum af honum.“

Varð var við Fisk og lagði á flótta

„Þá sagði hann mér að hann hefði bara verið í leit að partíi en hrökklast út undan látunum í hundinum og kettinum. Sérstaklega hefði rauði hundurinn verið með læti. Við eigum hins vegar engan hund. Hér er varðkötturinn Fiskur sem innbrotsmaðurinn óttaðist svo mjög að honum fannst hann vera rauður hundur,“ skrifaði Illugi í Facebook færslunni og birtir mynd af kettinum sínum. Færsluna má sjá hér að neðan.

Illugi segir að þrátt fyrir að sonurinn hafi vaknað upp við frekar óþægilegar aðstæður þá hafi innbrotsþjófurinn kvatt hann kurteisislega og komið vel fram. „Hann var afskaplega kurteis við drenginn.“

Lögregla kom á staðinn í kjölfarið. Illugi segist afar ánægður með viðbrögð lögreglu. „Ég er afskaplega ánægður með viðmót lögreglunnar og vinnubrögð,“ segir Illugi sem var hinn allra rólegasti í morgunsárið. 

Innbrotsþjófur dúkkaði upp á heimili mínu í morgunsárið. Drengurinn vaknaði við að maður sat inni hjá honum og rausaði....

Posted by Illugi Jökulsson on Friday, October 23, 2015