Níu þingmenn úr stjórnarandstöðu hafa óskað eftir skýrslu frá Gunnari Braga Sveinssyni utanríkisráðherra um áhrif hvalveiða á samskipti Íslands og annarra ríkja. Þingmennirnir vilja meðal annars fá að vita hver áhrif ákvarðana forseta Bandaríkjanna um að beita Ísland diplómatískum refsiaðgerðum hafði.

Beiðnin var lögð fram á Alþingi í gær og er í sex liðum. Óskað er eftir mati á stefnu Baracks Obama Bandaríkjaforseta gegn alþjóðlegri verslun með dýr í útrýmingarhættu. Þá vilja þingmennirnir að fjallað verði um hvort ástæðan fyrir því að bandarískir ráðherrar hafi ekki heimsótt Ísland um margra ára skeið, eða frá því Condoleezza Rice kom hingað til lands árið 2008, tengist hvalveiðum Íslendinga.

Þá er jafnframt óskað eftir mati á því hvort alþjóðleg verslun með hvalaafurðir hafi haft áhrif á sölu og markaðssetningu íslenskra gæðamatvæla í verslunum erlendis, til að mynda í Whole Foods Market og sambærilegum verslunum.

Þingmennirnir vilja að vita hvort orðspor Íslands hafi skaðast vegna alþjóðlegrar verslunar með hvalaafurðir, og vísa til þess að skipa- og flugfélög neita að flytja vörur sem eru á lista samnings yfir dýr í útrýmingarhættu og aukinnar áherslu aðildarríkjanna að stöðva slíka verslun.

Einnig vilja þeir að gert verði mat á lagaramma sem gildi um hvalveiðar í Bandaríkjunum, og óska eftir að upplýst verði hvort forseti Bandaríkjanna hafi með refsiaðgerðum sínum gegn Íslandi árin 2011 og 2014 farið að öllum tillögum ráðherranna um aðgerðir.

Að lokum er óskað eftir að í skýrslunni verði birtur listi yfir öll þau ríki heims sem hafa opinberlega mótmælt veiðum á hrefnu og langreyði við Ísland og að fjallað verði um utanríkispólitíska hagsmuni Íslands í því sambandi.

Beiðnina má lesa í heild hér.